گلگت بلتستان کے تمام اضلاع میں وسائل کی منصفانہ تقسیم کو یقینی بنائیں گے. وزیر اعلیٰ گلگت بلتستان امجد حسین
رپورٹ، 5 سی این نیوز
گلگت بلتستان کے تمام اضلاع میں وسائل کی منصفانہ تقسیم کو یقینی بنائیں گے. وزیر اعلیٰ گلگت بلتستان امجد حسین
وزیر اعلیٰ گلگت بلتستان امجد حسین نے شکیوٹ میں ایک بڑے عوامی اجتماع سے خطاب کرتے ہوئے کہا ہے کہ حلقے کے عوام نے تمام تر تعصبات اور سیاسی وابستگیوں سے بالاتر ہو کر ان پر جس اعتماد کا اظہار کیا ہے، وہ اس پر ان کے مشکور ہیں۔ گلگت بلتستان کے تمام اضلاع میں وسائل کی منصفانہ تقسیم کو یقینی بناتے ہوئے تمام علاقوں میں یکساں ترقیاتی اقدامات کیے جائیں گے اور عوام کے مسائل ان کی دہلیز پر حل ہوں گے۔شکیوٹ سکول کی اپ گریڈیشن کا منصوبہ مکمل ہو چکا ہے اور بہت جلد ہائی سکول شکیوٹ میں باقاعدہ کلاسز کا آغاز کر دیا جائے گا۔ اس موقع پر وزیر اعلیٰ نے محکمہ تعلیم کے حکام کو ہدایت کی کہ بارگو، شروٹ اور شکیوٹ کے سکولوں سے تنخواہیں لینے والے تمام اساتذہ کی حاضری یقینی بنائی جائے اور ڈیوٹی سے غیر حاضر اساتذہ کے خلاف فوری محکمانہ کارروائی عمل میں لائی جائے۔وزیر اعلیٰ نے شکیوٹ ڈسپنسری کو اپ گریڈ کر کے basic health unit (BHU) بنانے، جبکہ شروٹ، شکیوٹ اور بارگو کے لیے کسی موزوں جگہ پر 10 بیڈ کا ہسپتال اور انٹر کالج تعمیر کرنے کا اعلان کیا۔ وزیر اعلیٰ نے محکمہ برقیات کو ہدایت کی کہ شکیوٹ بورنگ منصوبے کو فوری فعال کرنے کے لیے درکار ٹرانسفارمر نصب کیا جائے، نیز آبپاشی کے لفٹ ایریگیشن منصوبے کے لیے متعلقہ محکمہ فوری کنسیپٹ پیپر تیار کرے۔ علاوہ ازیں، شکیوٹ سپورٹس گراؤنڈ کی اپ گریڈیشن اور سہولیات کی فراہمی کا بھی اعلان کیا گیا۔ وزیر اعلیٰ نے شکیوٹ کی لنک روڈز کو ایک ماہ کے اندر بہتر بنانے کی ہدایت دیتے ہوئے کہا کہ مقررہ مدت میں فلنگ مکمل نہ ہونے کی صورت میں C&W اور متعلقہ ٹھیکیدار کے خلاف سخت کارروائی ہو گی۔ وزیر اعلیٰ نے ڈی آئی جی ہیڈ کوارٹر کو شکیوٹ، شروٹ اور بارگو میں منشیات کے خلاف فوری کریک ڈاؤن کی ہدایت بھی جاری کی۔
بعد ازاں، شروٹ میں عوامی اجتماع سے خطاب کرتے ہوئے وزیر اعلیٰ نے کہا کہ عوام کے مسائل کے حل کے لیے تمام دستیاب وسائل بروئے کار لائے جائیں گے اور سیاسی مخالفین کو بھی پورا احترام دیا جائے گا۔ وزیر اعلیٰ نے گرلز ہائی سکول شروٹ کو آئندہ 10 ایام میں فعال کرنے کے احکامات دیتے ہوئے اساتذہ کی حاضری یقینی بنانے کا حکم دیا، جبکہ شروٹ میں ایک نیا سپورٹس گراؤنڈ تعمیر کرنے کا اعلان بھی کیا۔
بعدازاں وزیر اعلیٰ نے بارگو بالا اور بارگو پائین میں عوامی اجتماع سے خطاب میں کہا کہ بارگو کے عوام نے انتخابات میں سیاسی بصیرت کا مظاہرہ کرتے ہوئے مذہبی منافرت کو شکست دی ہے، جس کے مثبت اثرات پورے خطے پر مرتب ہو رہے ہیں۔ دور دراز علاقوں کو ترقی کی راہ پر گامزن کیا جائے گا۔ وزیر اعلیٰ نے اعلان کیا کہ بارگو روڈ کی توسیع و میٹلنگ کے منصوبے کا ٹینڈر جلد جاری ہوگا، بارگو بالا و پائین کے لیے آر سی سی پل تعمیر کیا جائے گا اور واٹر سپلائی سکیم سے پانی کی فراہمی یقینی بنائی جائے گی۔2010ء سے بارگو بالا میں گرلز ہائی سکول کی عمارت مکمل نہ ہونے پر وزیر اعلیٰ نے شدید برہمی کا اظہار کیا اور ہدایت کی کہ آئندہ دو ماہ کے اندر کام دوبارہ شروع کر کے منصوبے کو فوری مکمل کیا جائے۔ وزیر اعلیٰ نے کہا کہ ملوداس واٹر چینل اور روڈ کی تعمیر میں حائل رکاوٹیں دور کی جائیں گی تاکہ IFAD ان پر جلد کام شروع کر سکے۔ کھلوں کے گراؤنڈ پر جاری کام بھی جلد مکمل ہوگا، جبکہ بارگو کے پاور ہاؤسز کی مرمت کے لیے کنسیپٹ پیپر تیار کرنے کی ہدایت دی گئی۔وزیر اعلیٰ نے کہا کہ معاشی سرگرمیوں کے فروغ کے لیے خصوصی منصوبے شروع کیے جا رہے ہیں جن سے خواتین اور نوجوانوں کو روزگار ملے گا۔ وزیر اعلیٰ نے بوائز مڈل سکول بارگو پائین کو ہائی سکول کا درجہ دینے، گرلز ہائی سکول کے زیر تعمیر منصوبے کو جلد مکمل کرنے، سیکریٹری داخلہ کو بارگو میں پولیس تھانے کے قیام کا حکم دینے، بارگو پائین سکول کو 10 کمپیوٹرز کی فراہمی، قبرستان کے لیے زمین کی فراہمی اور تھول داس سکول کی اپ گریڈیشن کے اہم اعلانات بھی کیے۔
جو گزر گیا، اسے جانے دیں. محمد عابد رشید
جادو ٹونا: خوف، فریب اور حقیقت. یاسمین اختر طوبیٰ ریسرچ اسکالر گوجرہ، پاکستان
ناول: سنکھنی. مصنفہ: سلمیٰ کشم. تبصرہ نگار: عبدالحفیظ شاہد واہ کینٹ
Resources Across All Districts of Gilgit-Baltistan
