شگر میں جشنِ خزاں کی تقریبات کا آغاز، افتتاحی پولو میچز میں شگر اسٹار اور دم سم گرین کامیاب
رپورٹ، عابد شگری 5 سی این نیوز
شگر میں جشنِ خزاں کی تقریبات کا آغاز، افتتاحی پولو میچز میں شگر اسٹار اور دم سم گرین کامیاب، ضلع شگر میں جشنِ خزاں کی تقریبات کا باقاعدہ آغاز ہوگیا۔ اماچہ پولو گراؤنڈ شگر میں منعقدہ افتتاحی تقریب کے مہمانِ خصوصی سابق وزیر صحت گلگت بلتستان راجہ اعظم خان تھے، جنہوں نے فیسٹیول کا افتتاح کیا۔ افتتاحی تقریب کے موقع پر پولو کے دو میچز کھیلے گئے۔ پہلے میچ میں شگر اسٹار اور سکردو ریڈ کی ٹیمیں مدمقابل ہوئیں، جس میں شگر اسٹار نے سکردو ریڈ کو 2-7 سے شکست دے کر کامیابی حاصل کی۔دوسرے میچ میں دم سم گرین اور چھوربٹ کی ٹیموں کے درمیان مقابلہ ہوا۔ دم سم گرین نے عمدہ کھیل کا مظاہرہ کرتے ہوئے چھوربٹ کو 3-9 سے ہرا دیا۔ افتتاحی تقریب میں ڈپٹی کمشنر شگر شیر افضل، ڈسٹرکٹ پولیس آفیسر شگر وزیر نیک عالم اور اسسٹنٹ کمشنر شگر فیصل حیات گوندل سمیت ضلعی انتظامیہ کے افسران، مقامی افراد اور کھیلوں سے وابستہ شخصیات نے شرکت کی۔ پولو میچز دیکھنے کے لیے مقامی شائقین کے علاوہ ملکی و غیر ملکی سیاح بھی اماچہ پولو گراؤنڈ میں موجود تھے۔ جشنِ خزاں کے دوران مختلف کھیلوں اور ثقافتی سرگرمیوں کا انعقاد کیا جائے گا۔ فیسٹیول کے پروگرام میں پولو، فٹ بال، انڈور گیمز، نیزہ بازی، تیر اندازی اور دیگر روایتی و ثقافتی کھیلوں کے مقابلے شامل ہیں۔فیسٹیول میں مختلف علاقوں سے آنے والی ٹیمیں اور مقامی کھلاڑی کھیلوں کے مقابلوں میں حصہ لے رہے ہیں، جبکہ روایتی کھیلوں اور ثقافتی سرگرمیوں کو بھی پروگرام کا حصہ بنایا گیا ہے۔ انتظامیہ کے مطابق جشنِ خزاں کی تقریبات 8 اکتوبر تک جاری رہیں گی۔ فیسٹیول کے دوران کھیلوں کے مقابلوں کے ساتھ مختلف ثقافتی سرگرمیوں کا بھی انعقاد کیا جائے گا، جبکہ مقامی افراد اور سیاحوں کی شرکت کے لیے مختلف پروگرام ترتیب دیے گئے ہیں۔

اسکردو کھیل کے گراؤنڈ میں CCTV کیمرے نصب کیے جائیں، ایڈووکیٹ خواہر کلثوم ایلیاء شگری

Autumn Festival shigar