شگر، غیر سرکاری تنظیم کی خدمات اور سرگرمیوں کا جائزہ اس کے مقاصد، طریقہ کار اور معاشرتی اثرات کی بنیاد پر لیا جانا چاہیے. شگر صدر علماء امامیہ شگر آغا سید طہٰ شمس الدین الموسوی
رپورٹ، 5 سی این نیوز
شگر صدر علماء امامیہ شگر آغا سید طہٰ شمس الدین الموسوی نے بلتستان، خصوصاً شگر میں این جی اوز کی سرگرمیوں پر تحفظات کا اظہار کرتے ہوئے کہا ہے کہ کسی بھی غیر سرکاری تنظیم کی خدمات اور سرگرمیوں کا جائزہ اس کے مقاصد، طریقہ کار اور معاشرتی اثرات کی بنیاد پر لیا جانا چاہیے۔ جامع مسجد صاحب الزمان شگر میں خطبہ جمعہ کے اجتماع سے خطاب کرتے ہوئے آغا سید طہٰ شمس الدین الموسوی نے سوال اٹھایا کہ اگر بعض این جی اوز کا بنیادی مقصد صحت اور فلاحی خدمات کی فراہمی ہے تو جنگ اور غربت سے متاثرہ علاقوں، خصوصاً یمن، غزہ اور کشمیر میں ان سرگرمیوں کا دائرہ کیوں نہیں بڑھایا جاتا۔انہوں نے بلتستان میں این جی اوز کی سرگرمیوں کے حوالے سے کہا کہ خطے میں فلاحی ضروریات کا جائزہ لیتے ہوئے مقامی حالات اور ضروریات کو بھی مدنظر رکھنا چاہیے۔ ان کا کہنا تھا کہ کسی ادارے کی جانب سے تعلیم، صحت یا دیگر فلاحی خدمات فراہم کیے جانے کے ساتھ اس کے نظریات، طریقہ کار اور طویل المدتی مقاصد کا جائزہ بھی ضروری ہے۔ آغا سید طہٰ شمس الدین الموسوی نے کہا کہ اسلام میں فلاح و خدمتِ انسانیت کو بنیادی اہمیت حاصل ہے۔ ان کے مطابق قرآن مجید ہدایت اور فلاح کی کتاب ہے جبکہ ائمۂ اطہارؑ کی تعلیمات میں بھی انسانیت کی خدمت پر زور دیا گیا ہے۔ انہوں نے بعض این جی اوز کی سرگرمیوں کے حوالے سے خدشات کا اظہار کرتے ہوئے کہا کہ مختلف عنوانات کے تحت ہونے والی بعض سرگرمیوں کے معاشرتی اور دینی اثرات کا جائزہ لینا ضروری ہے۔ ان کا کہنا تھا کہ بالخصوص نوجوان نسل کی دینی وابستگی، اہل بیتؑ سے محبت اور مقامی معاشرتی اقدار کے حوالے سے عوام کو محتاط رویہ اختیار کرنا چاہیے۔صدر علماء امامیہ شگر نے چھورکاہ میں ایک این جی او کی سرگرمیوں سے متعلق گزشتہ ایک ہفتے سے جاری بحث کا حوالہ دیتے ہوئے کہا کہ ادارے کے حق یا مخالفت میں رائے قائم کرنے سے قبل اس کی سرگرمیوں اور مقاصد کا غیر جانب دارانہ جائزہ لیا جانا چاہیے۔ انہوں نے چھورکاہ اور پورے بلتستان میں شیخ محسن علی نجفی کی دینی و تعلیمی خدمات کا بھی ذکر کیا اور کہا کہ علاقے میں قائم تعلیمی اداروں اور محمدیہ ٹرسٹ کی تعلیمی خدمات کو بھی سامنے رکھنا چاہیے۔ آغا سید طہٰ شمس الدین الموسوی نے کہا کہ بلتستان، خصوصاً شگر میں کام کرنے والے غیر سرکاری اداروں کے حوالے سے عوام کو ان کے منصوبوں، سرگرمیوں اور مقامی معاشرے پر ممکنہ اثرات کے بارے میں معلومات حاصل کرنی چاہئیں۔انہوں نے شہریوں پر زور دیا کہ وہ کسی بھی ادارے کی سرگرمیوں کے بارے میں جذبات کے بجائے معلومات اور شعوری جائزے کی بنیاد پر رائے قائم کریں اور اپنی دینی، معاشرتی اور ثقافتی اقدار کے تحفظ کے لیے ذمہ دارانہ کردار ادا کریں۔
اسکردو کھیل کے گراؤنڈ میں CCTV کیمرے نصب کیے جائیں، ایڈووکیٹ خواہر کلثوم ایلیاء شگری
فیصلوں کا بوجھ، توقعات کے حصار اور مصنوعی ذہانت کا واہمہ. ڈاکٹر فیصل سعید ٹورانٹو، کینیڈا
دارالخلافہ، دارالسلطنت اور دارالحکومت۔ لفظوں کے پیچھے چھپی تاریخ۔ سلیم خان ہیوسٹن (ٹیکساس) امریکا
Social Impact
