اسکردو کھیل کے گراؤنڈ میں CCTV کیمرے نصب کیے جائیں، ایڈووکیٹ خواہر کلثوم ایلیاء شگری
اسکردو کھیل کے گراؤنڈ میں CCTV کیمرے نصب کیے جائیں، ایڈووکیٹ خواہر کلثوم ایلیاء شگری، معروف سماجی رہنما ایڈووکیٹ خواہر کلثوم ایلیاء شگری نے کھیل کے گراؤنڈ میں ہنگامہ آرائی، پتھراؤ، بدنظمی اور اشتعال انگیزی کے بڑھتے واقعات کی روک تھام کے لیے انتظامیہ سے گراؤنڈ میں فوری طور پر CCTV کیمرے نصب کرنے کا مطالبہ کیا ہے۔انہوں نے کہا کہ کھیل کے میدان نوجوانوں کے لیے صحت مند سرگرمیوں، مثبت سوچ اور باہمی ہم آہنگی کے مراکز ہونے چاہئیں، تاہم بعض مواقع پر ہنگامہ آرائی، پتھراؤ اور غیر ذمہ دارانہ رویے کے باعث کھیل کا ماحول خراب ہونے کے ساتھ کھلاڑیوں، تماشائیوں اور دیگر شہریوں کی سلامتی بھی متاثر ہوتی ہے۔ ایڈووکیٹ خواہر کلثوم ایلیاء شگری کا کہنا تھا کہ گراؤنڈ میں جدید CCTV نگرانی کا نظام قائم ہونے سے میچ کے دوران ہونے والے واقعات کی مؤثر مانیٹرنگ ممکن ہوگی، جبکہ کسی بھی ناخوشگوار واقعے کی صورت میں قانون کی خلاف ورزی کرنے والے افراد کی شناخت اور ان کے خلاف قانونی کارروائی میں بھی مدد ملے گی۔انہوں نے کہا کہ صرف واقعہ پیش آنے کے بعد کارروائی کرنے کے بجائے انتظامیہ کو پیشگی حفاظتی اقدامات پر توجہ دینی چاہیے۔ گراؤنڈ میں مناسب سکیورٹی، داخلی و خارجی راستوں کی نگرانی، ضابطۂ اخلاق کی پابندی اور تماشائیوں کے لیے واضح ہدایات بھی ضروری ہیں۔ ان کا کہنا تھا کہ انتظامی نگرانی کے مؤثر نظام کے فقدان کے باعث ہر سال کھیلوں کے دوران ایسے واقعات دیکھنے میں آتے ہیں، جو نہ صرف کھیلوں کی سرگرمیوں کو متاثر کرتے ہیں بلکہ علاقے کے معمولاتِ زندگی، امن و امان اور بالخصوص بچوں اور نوجوانوں پر بھی منفی اثرات مرتب کرتے ہیں۔ ایڈووکیٹ خواہر کلثوم ایلیاء شگری نے انتظامیہ سے مطالبہ کیا کہ کھیل کے قوانین اور ضابطۂ اخلاق پر سختی سے عمل درآمد یقینی بنایا جائے، گراؤنڈ میں CCTV کیمروں سمیت ضروری سکیورٹی انتظامات کیے جائیں اور ہنگامہ آرائی، پتھراؤ یا دیگر خلافِ قانون سرگرمیوں میں ملوث افراد کے خلاف قانون کے مطابق کارروائی کی جائے، تاکہ کھیلوں کے میدان کو پُرامن، محفوظ اور صحت مند سرگرمیوں کے لیے سازگار بنایا جا سکے۔

فیصلوں کا بوجھ، توقعات کے حصار اور مصنوعی ذہانت کا واہمہ. ڈاکٹر فیصل سعید ٹورانٹو، کینیڈا

Sports Grounds in Skardu