فیصلوں کا بوجھ، توقعات کے حصار اور مصنوعی ذہانت کا واہمہ. ڈاکٹر فیصل سعید ٹورانٹو، کینیڈا
آج کا یہ پرشور ڈیجیٹل دور، جہاں زندگی ایک دلفریب بھنور کی مانند رواں دواں ہے، انسان کو لمحہ بہ لمحہ بدلتی ہوئی ریلز، اسکرین کی جھلملاہٹ اور مختصر ویڈیو کلپس کی عجلت میں الجھا کر رکھ دیتا ہے۔ اس مٹی کے کھلونے نما دنیا میں تفریح اب گہرائی سے عاری ہو چکی ہے۔ ایسے ہی کسی خاموش لمحے، جب نظر اسکرین کے کسی گوشے سے الجھی تو ایک ادھیڑ عمر جوڑے کا وہ مکالمہ روح میں اتر گیا، جو اپنی زندگی کے ڈھلتے سورج کے سامنے کھڑے ہو کر اپنی تشنہ آرزوؤں اور ادھورے خوابوں کا سارا ملبہ اپنی اولاد کے معصوم کندھوں پر ڈال رہا تھا۔ ان کا شکوہ تھا کہ ان کی ساری خواہشات بچوں کی پرورش کی نذر ہو گئے۔ یہ منظر محض ایک گھر کی کہانی نہیں، بلکہ اس عمومی سماجی نفسیات کا آئینہ ہے جہاں انسان اپنی زندگی کی نامکمل تمناؤں اور ناآسودہ خواہشات کا بوجھ دوسروں پر ڈال کر خود کو سبکدوش سمجھ بیٹھتا ہے۔ مگر ذرا دل پر ہاتھ رکھ کر سوچیے، کیا اپنے فیصلوں کی کسک کا الزام کسی اور کے سر تھوپ دینا منصفانہ رویہ ہے؟
“ان کی خوشی کے لیے قربانی ” کی حقیقت ایک خوش فہم حصار سے زیادہ کچھ نہیں. ہماری زیست کا ایک طویل اور قیمتی حصہ اسی خوش فہمی کی تپش میں گزر جاتا ہے کہ ہم جو کچھ بھی کر رہے ہیں، وہ محض دوسروں کی مسرت اور بھلائی کی خاطر ہے۔ ہم اپنی ذات، اپنے شوق اور اپنے خوابوں کو پسِ پشت ڈال کر خود کو یہ یقین دلاتے ہیں کہ ہم نے تو اپنی دنیا کو قربان کر دیا ہے۔
مگر وقت جب اپنی چال چلتا ہے اور موسم بدلتے ہیں، تو یہی بے لوث سمجھی جانے والی قربانی دھیرے سے ایک دبے ہوئے شکوے اور تلخ احساس میں تبدیل ہونے لگتی ہے۔ انسان کے باطن میں ایک خاموش اور بے رحم بہی کھاتہ کھل جاتا ہے جس میں لمحہ بہ لمحہ یہ حساب درج ہونے لگتا ہے:
* ”ہم نے ان کے لیے دن رات ایک کر دیے…“
* ”ہم نے اپنی جوانی ان کی راہ میں گنوا دی…“
* ”تو پھر اب بدلے میں وہ ہماری ہر بات کیوں نہیں مانتے؟“
اور جب وہ اپن ہمارے بنے ہوئے توقعات کے سانچے پر پورے نہیں اترتے، تو اندر کا طوفان مایوسی اور شکوے کی صورت میں پھٹ پڑتا ہے۔
انتخاب کا اختیار اور ذاتی ذمے داری کی سنگلاخ حقیقت تو یہ ہے کہ کائنات کے اس وسیع کینوس پر انسان اپنی زندگی میں جو ہر ایک قدم اٹھاتا ہے—خواہ وہ کسی کی گہری چاہت میں اٹھائے گئے ہوں، کسی ان دیکھے خوف کے سائے میں یا کسی کٹھن مجبوری کے گھیرے میں—اس فیصلے پر مہر ثبت کرنے والا ہمیشہ وہ خود ہی ہوتا ہے۔
اگر ہم نے کسی کی خاطر اپنے کسی خواب کا گلا گھونٹ دیا، تو وہ ہمارا اپنا چنا ہوا راستہ تھا۔ پھر اس انتخاب کے کانٹوں کا بوجھ کسی اور کے نازک کندھوں پر لاد دینا سراسر ناانصافی ہے۔ رشتوں کے اس کارواں میں ایثار، قربانی اور سمجھوتہ وہ خوشبو ہیں جو فضا کو مہکاتے ہیں، مگر وہ تبھی تک روح کو سکون بخشتے ہیں جب وہ کسی چھپے ہوئے سودے، شرط یا بدلے کی توقع کے بغیر ہوں؛ جیسے کوئی پودا اپنی مرضی سے پھول اور خوشبو لٹاتا ہے۔
محبت اور احسان کے دائرے میں ایک نہایت باریک اور نازک سی لکیر حائل ہوتی ہے۔ احسان کی فطرت میں ہمیشہ حساب رکھنا اور بدلے کا تقاضا کرنا شامل ہے—جیسا کہ قرآن حکیم میں ارشاد ہوتا ہے: کیا احسان کا بدلہ احسان کے علاوہ کچھ اور ہو سکتا ہے؟ اس کے برعکس، سچی محبت سراپا بے لوث ہوتی ہے، وہ کسی کھاتہ یا حساب کی محتاج نہیں ہوتی۔
جب ہم رشتوں کے تعلق میں توقعات کی آہنی زنجیریں باندھ لیتے ہیں، تو محبت کا سارا حسن ماند پڑ جاتا ہے۔ کسی کے چہرے پر ایک ادنیٰ سی مسکان بکھیرنے کے لیے خود کو مٹا دینا ایک انتہائی حسین عمل ہے، بشرطیکہ وہ صرف اور صرف دل کی رضا سے ہو۔ لیکن اپنے فیصلوں کا سارا اختیار کسی اور کے سپرد کر کے خود کو مظلوم سمجھنا اپنے ہی وجود کے ساتھ سب سے بڑا ظلم ہے۔
آخر کار، زندگی کی مسافت یہیں آ کر رکتی ہے کہ ہم جو بھی راستہ چنتے ہیں، وہ ہمارا اپنا منتخب کردہ مقدر ہوتا ہے۔ خواہ وہ خوشی کا گلزار ہو یا مجبوری کا کٹھن صحرا—قلم ہمیشہ ہمارے ہی ہاتھ میں رہتا ہے۔
اپنے فیصلوں کی پوری ذمے داری اپنے سر لینا، شکوک و شکایات کی گرد کو خود سے جھاڑ دینا اور زندگی کو اس کے اصل رنگ میں قبول کرنا ہی دراصل قلبِ مطمئن اور حقیقی سکون کی جانب پہلا اور سب سے پکا قدم ہے۔
آج کا انسان جب رشتوں میں توقعات کے بوجھ تلے دب جاتا ہے اور اپنوں سے اپنے دل کا حال کہنے سے ڈرتا ہے، تو وہ فیصلوں کے بوجھ سے فرار کا نیا ذریعہ اختیار کرتے ہوئے اپنا یہ بوجھ مصنوعی ذہانت کے سامنے لا کر رکھ دیتا ہے۔ ایسے میں AI ایک ایسے ہمدرد سامع کی طرح پیش آتی ہے جو تھکتا نہیں، برا نہیں مانتا اور ہر بات پر سر ہلاتا ہے۔ لیکن یہ مصنوعی تسکین صرف ایک خطرناک فریب ہے۔ رشتوں کا اصل حسن تو باہمی قربانی، غلطیوں اور ان کی معافی میں پوشیدہ ہے، جبکہ ایک الگورتھم کے پاس روح نہیں ہوتی—وہ آپ کی بات سن تو سکتا ہے، مگر آپ کے درد کی تپش محسوس نہیں کر سکتا۔
جیسا کہ ہم نے دیکھا، اس جذباتی بحران کی اصل جڑ اپنے فیصلوں کی ذمے داری دوسروں پر ڈالنا ہے۔ اب لوگ زندگی کے اہم ترین فیصلوں (کیریئر، تعلقات، یا ذاتی چناؤ) کے لیے بھی خود زحمت اٹھانے کے بجائے AI سے مشورے مانگتے ہیں۔ جب فیصلہ غلط ثابت ہوتا ہے، تو انسان اپنی ناکامی کا ملبہ محض اپنی ذات یا رشتوں پر ہی نہیں، بلکہ “خراب اے آئی ایڈوائس” پر بھی ڈالنے کا نیا بہانہ پا لیتا ہے۔ یوں ذمے داری سے فرار کا دائرہ اور وسعت اختیار کر جاتا ہے۔
حساب کتاب کی ڈیجیٹل دنیا مکمل طور پر “حساب” اور ڈیٹا پر چلتی ہے اس کے نزدیک ہر عمل کا ایک ردِ عمل اور آؤٹ پٹ ہوتا ہے۔ جب ہم اپنے جذبات کو بھی اسی پیمانے پر تولنے لگتے ہیں—کہ “میں نے اتنا کیا تو بدلہ کیا ملا” — تو ہم اپنی محبت کو بھی ایک الگورتھم بنا بیٹھتے ہیں۔ مصنوعی ذہانت انسان کو یہ تو سکھا سکتی ہے کہ اپنے تعلقات میں بیلنس کیسے رکھا جائے، مگر وہ وہ بے لوث قربانی اور سچی روح عطا نہیں کر سکتی جو کسی حساب کی محتاج نہ ہو۔
مصنوعی ذہانت اس جذباتی بحران کا حل نہیں، بلکہ اکثر اوقات اس تنہائی کا ایک پردہ ہے جس میں انسان اپنوں سے کٹ کر ایک بے جان مشین کے قریب ہو جاتا ہے۔ حقیقی سکون کسی کوڈ یا الگورتھم میں نہیں، بلکہ اپنے فیصلوں کی خود ذمے داری لینے اور بغیر کسی حساب کتاب کے محبت کرنے کے شجاعت میں پوشیدہ ہے۔
کیا آپ کے نزدیک بھی رشتوں میں توقعات کا یہ بوجھ محبت کی اس پاکیزہ روح کو آہستہ آہستہ مجروح کر دیتا ہے؟ اس مشینی دور میں آپ کا کیا تجربہ ہے—کیا ٹیکنالوجی نے ہمارے جذباتی بوجھ کو ہلکا کیا ہے یا ہمیں ایک دوسرے سے مزید دور کر دیا ہے؟
احساس کا زوال. کالم نگار، لیکچرار عزت علی پارا چنار
Burden of Decisions
