شگر ایبروزی ہائر سیکنڈری اسکول شگر نے میٹرک امتحانات میں تاریخی کامیابی حاصل کر لی
رپورٹ، 5 سی این نیوز
شگر ایبروزی ہائر سیکنڈری سکول شگر نے میٹرک امتحانات میں تاریخی کامیابی حاصل کر لی
100 فیصد کامیابی، ضلع شگر میں پہلی پوزیشن، بلتستان کے ٹاپ 10 تعلیمی اداروں میں شامل, ایبروزی ہائر سیکنڈری سکول شگر نے فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) کے سالانہ ایس ایس سی (میٹرک) امتحانات میں شاندار کارکردگی کا مظاہرہ کرتے ہوئے 100 فیصد کامیابی حاصل کر لی۔ ادارے نے ضلع شگر میں پہلی پوزیشن حاصل کی، جبکہ فیڈرل بورڈ کی درجہ بندی کے مطابق بلتستان کے ٹاپ 10 تعلیمی اداروں میں بھی نمایاں مقام حاصل کیا۔اعلان کردہ نتائج کے مطابق سکول کے 50 فیصد سے زائد طلبہ و طالبات نے A+ اور A گریڈ حاصل کیے، جو ادارے کے اعلیٰ تعلیمی معیار، اساتذہ کی محنت اور طلبہ کی لگن کا مظہر ہے۔انفرادی نتائج میں کونین زہرا نے 998 نمبر حاصل کرکے نمایاں پوزیشن حاصل کی، جبکہ کومل زہرا دوسری پوزیشن پر رہیں۔ دونوں طالبات کی کامیابی کو ضلع شگر کے تعلیمی حلقوں نے خوش آئند قرار دیتے ہوئے ان کے روشن مستقبل کے لیے نیک خواہشات کا اظہار کیا۔ادارے کی انتظامیہ کا کہنا ہے کہ ایبروزی ہائر سیکنڈری سکول گزشتہ کئی برسوں سے مسلسل بہترین نتائج کی روایت برقرار رکھے ہوئے ہے۔ اسی کامیابی کے تسلسل میں رواں تعلیمی سال سے ہائیر سیکنڈری (کالج) کلاسز کا بھی آغاز کر دیا گیا ہے، اور انتظامیہ نے اس عزم کا اظہار کیا ہے کہ انٹرمیڈیٹ کے امتحانات میں بھی نمایاں نتائج دے کر ادارے کی تعلیمی روایت کو مزید مستحکم کیا جائے گا۔نتائج کے اعلان کے بعد طلبہ، والدین اور اساتذہ میں خوشی کی لہر دوڑ گئی، جبکہ مختلف سماجی، تعلیمی اور عوامی حلقوں نے ادارے کی اس تاریخی کامیابی پر انتظامیہ، اساتذہ، طلبہ اور والدین کو مبارکباد پیش کرتے ہوئے اسے ضلع شگر کے تعلیمی شعبے کے لیے ایک اہم سنگِ میل قرار دیا۔
گلگت بلتستان میں ماحولیاتی تبدیلی اسباب اثرات اور ممکنہ تدارک . اعجاز شگری
شگر کے ٹو بیس کیمپ سے سکردو تک چار روز میں دوڑ، ایشین چیمپئن جمال سیڈ نے نیا ریکارڈ قائم کر دیا
urdu news update fbise Matriculation result
