شگر کے ٹو بیس کیمپ سے سکردو تک چار روز میں دوڑ، ایشین چیمپئن جمال سیڈ نے نیا ریکارڈ قائم کر دیا
شگر کے ٹو بیس کیمپ سے سکردو تک چار روز میں دوڑ، ایشین چیمپئن جمال سیڈ نے نیا ریکارڈ قائم کر دیا, معروف بین الاقوامی اتھلیٹ اور ایشین چیمپئن جمال سیڈ نے صرف چار روز میں کے ٹو (K2) بیس کیمپ سے سکردو تک دوڑ مکمل کرکے نیا ریکارڈ قائم کر دیا۔ وہ کے ٹو بیس کیمپ سے سکردو تک یہ دشوار گزار فاصلہ مسلسل دوڑ کر طے کرنے والے پہلے پاکستانی بن گئے ہیں۔جمال سیڈ نے 26 جولائی کو اپنے مشن کا آغاز کیا اور بلند و بالا پہاڑوں، گلیشیئرز، دشوار گزار راستوں اور سخت موسمی حالات کا مقابلہ کرتے ہوئے کامیابی کے ساتھ سکردو پہنچ گئے۔ ان کے اس کارنامے کو ایڈونچر اسپورٹس کے میدان میں ایک اہم سنگِ میل قرار دیا جا رہا ہے۔ شگر پہنچنے پر ڈپٹی کمشنر شگر شیر افضل نے ان کا پرتپاک استقبال کیا، انہیں تعریفی سند پیش کی اور اس غیرمعمولی کامیابی پر مبارک باد دی۔ اس موقع پر انہوں نے کہا کہ جمال سیڈ نے یہ کارنامہ انجام دے کر نہ صرف پاکستان بلکہ گلگت بلتستان کا نام بھی روشن کیا ہے۔ ان کے بقول، یہ کامیابی خطے میں سیاحت کے فروغ اور نوجوانوں کو کھیلوں کی جانب راغب کرنے میں اہم کردار ادا کرے گی۔ اس موقع پر جمال سیڈ نے میڈیا سے گفتگو کرتے ہوئے کہا کہ وہ اللہ تعالیٰ کے شکر گزار ہیں کہ انہوں نے اپنا مشن کامیابی سے مکمل کیا۔ ان کا کہنا تھا کہ اس مہم کا مقصد صرف ایک ریکارڈ قائم کرنا نہیں بلکہ دنیا کو گلگت بلتستان کے بے مثال قدرتی حسن سے روشناس کرانا، سیاحت کو فروغ دینا اور نوجوانوں کو صحت مند سرگرمیوں کی طرف راغب کرنا بھی ہے۔ ماہرین کے مطابق کے ٹو بیس کیمپ سے سکردو تک کا راستہ دنیا کے مشکل ترین ٹریکنگ روٹس میں شمار ہوتا ہے، جہاں دشوار گزار گلیشیئرز، بلند پہاڑ اور سخت موسمی حالات کسی بھی مہم جو کے لیے بڑا چیلنج ہوتے ہیں۔ ایسے میں چار روز کے اندر یہ فاصلہ دوڑ کر طے کرنا غیرمعمولی جسمانی اور ذہنی صلاحیت کا مظہر ہے۔ جمال سیڈ کی اس کامیابی کو کھیلوں اور سیاحت دونوں شعبوں کے لیے ایک اہم پیش رفت قرار دیا جا رہا ہے، جس سے نہ صرف گلگت بلتستان کے عالمی تشخص کو تقویت ملے گی بلکہ نوجوان نسل کو بھی مثبت اور صحت مند سرگرمیوں کی جانب راغب کرنے میں مدد ملے گی۔
پاکستان ریلوے کی تاریخ کب شروع ہوئی؟ مکمل جائزہ
urdu news update shigar k2 base camp to skardu
