جادو. آمینہ یونس، بلتستانی
استانی چھوٹے چھوٹے بچوں کے ساتھ کلاس روم میں آلتی پالتی مارے بیٹھی تھیں۔ وہ چھوٹی جماعت کے بچوں کو پڑھاتی تھیں۔ بچے جو کرتے، استانی بھی ان کے ساتھ وہی کرتیں۔ جب بچے آلتی پالتی مار کر بیٹھتے تو وہ بھی اسی طرح بیٹھ جاتیں۔ آج بھی بچے ان کے گرد بیٹھے تھے کہ ایک بچہ ضد کرتے ہوئے بولا، ’’استانی جی! ہمیں کوئی کہانی سنائیں۔‘‘ استانی مسکرائیں اور بولیں، ’’چلو بچو! آج آپ کو ایک سبق آموز کہانی سناتی ہوں۔‘‘ وہ کہنے لگیں، ’’ایک جنگل میں ایک شیر رہتا تھا۔ وہ بہت طاقتور تھا۔ جنگل کے سارے جانور اس سے ڈرتے تھے اور اس کا ہر حکم مانتے تھے۔ کبھی کبھی شیر ظلم کی حد پار کر جاتا اور دوسرے جانوروں سے انسانوں کا شکار بھی کرواتا۔ بے چارے چھوٹے جانور اس کے خوف سے مجبور ہو کر اس کا حکم مانتے۔ ایک دن شیر کی غیر موجودگی میں لومڑی نے جنگل کے جانوروں کو جمع کیا اور بولی، ’’میرے عزیز بھائیو اور دوستو! ہم کب تک خاموش رہیں گے؟ کب تک شیر کے ظلم سے ڈر کر خدا کی مخلوق کا شکار کرتے رہیں گے؟‘‘ سب جانور خاموشی سے اس کی بات سنتے رہے۔ پھر ہرن اٹھ کھڑا ہوا اور بولا، ’’لومڑی ٹھیک کہہ رہی ہے۔ آج سے ہم سب مل کر شیر کے ظلم کے خلاف کھڑے ہوں گے۔‘‘ سب جانوروں نے اس کا ساتھ دینے کا وعدہ کیا۔ آخرکار شیر سے تنگ آئے جانوروں نے بغاوت شروع کر دی۔ جب شیر واپس آیا تو جنگل کا نقشہ ہی بدلا ہوا تھا۔ سب جانور ایک دوسرے کے ساتھ کھڑے تھے۔ شیر یہ دیکھ کر سوچنے لگا، ’’ان سب کے ایک ہونے میں میرا ہی ہاتھ ہے۔ میں خود کو طاقتور سمجھ کر سب کو اپنے پاؤں تلے روندتا رہا۔ مجھ میں رحم، اخلاص اور خدا ترسی ختم ہو گئی تھی۔ میں بھول گیا تھا کہ مجھ سے بھی زیادہ طاقتور ذات اوپر موجود ہے۔‘‘ شیر کو اپنی غلطی کا احساس ہوا اور اس نے اپنا رویہ بدلنے کا فیصلہ کیا۔ اس دن کے بعد اس نے جانوروں پر ظلم کرنا چھوڑ دیا۔ استانی نے بچوں کی طرف دیکھا اور بولیں، ’’بچو! لومڑی ایک چھوٹا سا جانور تھی، مگر اس کی ہمت نے جادو کر دیا۔ اس نے مظلوم جانوروں کو ظلم سے نجات دلانے کی راہ دکھائی۔ اس لیے یاد رکھو، ہمت کے سامنے چھوٹے بڑے کی کوئی حیثیت نہیں ہوتی۔ اگر ارادہ مضبوط ہو تو ایک چھوٹا سا جانور بھی بڑا کام کر سکتا ہے۔‘‘کہانی ختم کرکے استانی نے بچوں کی طرف دیکھا۔ جو بچے دورانِ کہانی بار بار سوال کر رہے تھے، اب خاموشی سے ان کی طرف دیکھ رہے تھے۔ استانی نے مسکرا کر کہا، ’’بچو! اس کہانی سے ہمیں کیا سبق ملتا ہے؟‘‘ ایک بچے نے فوراً جواب دیا، ’’یہ کہ طاقتور کو کمزور پر ظلم نہیں کرنا چاہیے۔‘‘ دوسرا بولا، ’’اور سب مل جائیں تو بڑے سے بڑے ظالم کا مقابلہ کیا جا سکتا ہے۔‘‘ استانی مسکرائیں اور بولیں، ’’بالکل! لومڑی چھوٹا سا جانور تھی، مگر اس کی ہمت نے جادو کر دیا۔ یاد رکھو، اصل طاقت جسم میں نہیں، ہمت اور اچھے ارادے میں ہوتی ہے۔‘‘
نبی کریم ﷺ کا پیغامِ محبت و امن. سلیم خان ہیوسٹن (ٹیکساس) امریکا
Magic
