شگر سردیوں سے قبل بجلی کے نظام کی بہتری کے لیے مؤثر اقدامات کی ہدایت
رپورٹ، 5 سی این نیوز
شگر سردیوں سے قبل بجلی کے نظام کی بہتری کے لیے مؤثر اقدامات کی ہدایت, ڈپٹی کمشنر شگر شیر افضل نے محکمہ برقیات کے افسران کو سردیوں سے قبل بجلی کے نظام میں موجود نقائص دور کرنے اور عوام کو بلا تعطل بجلی کی فراہمی یقینی بنانے کی ہدایت کردی۔ ڈپٹی کمشنر شگر کی زیرِ صدارت محکمہ برقیات کے افسران کا اجلاس ہوا، جس میں ایگزیکٹو انجینئر محکمہ برقیات حبیب اللہ سمیت دیگر متعلقہ افسران نے شرکت کی۔ اجلاس میں ضلع شگر میں بجلی کی موجودہ صورتحال، پاور ہاؤسز کی کارکردگی، بجلی کی پیداوار اور ترسیلی نظام کا جائزہ لیا گیا، جبکہ سردیوں کے دوران بجلی کی بہتر فراہمی کے لیے اقدامات پر بھی غور کیا گیا۔ڈپٹی کمشنر نے ہدایت کی کہ سردیوں کے آغاز سے قبل بجلی کے نظام میں موجود تمام نقائص دور کیے جائیں اور پاور ہاؤسز سمیت ترسیلی نظام کی مؤثر نگرانی یقینی بنائی جائے۔انہوں نے تمام پاور ہاؤسز پر تعینات سب انجینئرز کو روزانہ حاضری یقینی بنانے جبکہ ایس ڈی اوز کو روزانہ کی بنیاد پر پاور ہاؤسز کی نگرانی اور بجلی کی پیداوار و ترسیل سے متعلق مسائل فوری حل کرنے کی ہدایت کی۔ ڈپٹی کمشنر نے ایگزیکٹو انجینئر محکمہ برقیات کو بھی پاور ہاؤسز اور ترسیلی نظام کے دورے کرکے صورتحال کا جائزہ لینے اور افسران و اہلکاروں کی کارکردگی کی نگرانی کرنے کی ہدایت کی۔شیر افضل کا کہنا تھا کہ عوام کو بجلی کی بہتر فراہمی ضلعی انتظامیہ کی ترجیحات میں شامل ہے، اس لیے محکمہ برقیات کے افسران و اہلکار اپنی ذمہ داریاں مؤثر انداز میں انجام دیں تاکہ سردیوں میں عوام کو بجلی کی فراہمی کے حوالے سے کم سے کم مشکلات کا سامنا ہو۔اجلاس میں سردیوں سے قبل بجلی کے نظام کو مستحکم بنانے اور عوام کو بہتر بجلی کی فراہمی کے لیے تمام ممکنہ اقدامات بروئے کار لانے کے عزم کا اظہار کیا گیا۔
عنوان: “ایک سپلی اور ایک زندگی ختم؟” محمد دلاور بلتستانی
غزل ، تری یاد آئی تو آنکھیں کھلیں. مرے دل سے ہر غم جدا ہو گیا. یاسمین اختر طوبیٰ
