صنف: مزاح نگاری عنوان: ” نجی اسکول کی استانی” سیدہ ثمرہ فاطمہ
صبح سات بجے ہی واٹس ایپ گروپ میں دھماکہ ہوتا ہے ٹیم الرٹ ہو جائیں۔ آج سر اچانک ہر کمرہ جماعت کا معائنہ کریں گے۔ تیار شیار ہو کر آئیں وقت پر آئیں۔ مسکراتے ہوے آ ئیں ورنہ نوکری گئی۔
استانی آنکھیں ملتی ہوئی، پچیس ہزار کی تنخواہ اور کروڑوں روپے کا نخرہ لے کر اسکول پہنچتی ہے۔
نجی اسکول وہ واحد جگہ ہے جہاں استانی ایک ہی وقت میں استانی،ماں، باپ، ڈاکٹر ،نرس، سیکورٹی گارڈ، مالی، کلینر اور نفسیاتی ڈاکٹر سمیت سب کچھ ہوتی ہے۔
صبح بچہ چھٹی کرے تو کال استانی جی آپ نے گھر آ کر کیوں نہیں جگایا ہمارے بچے کو؟
ضرور آپ نے ڈرایا ہو گا جس کی وجہ سے اسے بخار ہے اور وہ آج اسکول نہیں آ رہا۔
استانی پانچ منٹ لیٹ ہو جائے تو وارننگ لیٹر کے ساتھ میٹھی بے عزتی اور لیکچر کہ وقت کی پابندی سے قومیں بنتی ہیں۔
بچہ ماں کی بات نہ مانے تو استانی جی آپ نے تربیت میں کمی کی ہے،
آپ نے ہمارے بچے کو نہیں سمجھایا کہ ماں باپ سے کیسے بات کرنی ہے؟
بچہ سبزی نہ کھائے تو استانی جی آپ نے غذائیت نہیں سمجھائی۔
بچہ گھر کا کام نہ کرے استانی جی آپ نے طریقہ نہیں بتایا۔ آپ کا فرض بنتا ہے کہ آپ ہمارے بچے کو گھر کا کام ہمارے گھر آ کر کروائیں۔
کلاس میں قدم رکھتے ہی بچوں کا کنسرٹ شروع!
استانی جی سر میں درد ہے، پاؤں میں درد ہے، دل میں درد ہے. سانس نہیں آ رہی۔
استانی جی قلم نہیں ہے، پنسل نہیں ہے، ربڑ نہیں ہے، کاپی نہیں ہے۔
استانی جی گھر کا کام چھوٹی بہن نے پھاڑ دیا، بھائی نے جلا دیا، بلی کھا گئی۔
استانی جی اس نے میری طرف گندی شکل بنائی،
استانی جی فلاں نے میری پینسل چرا لی بلکہ میرا سب کچھ چرا لیا۔
استانی جی فلاں مجھے دیکھ رہا ہے، مار رہا ہے، اپنا لنچ کر رہا ہے۔ باتیں کر رہا ہے۔ سانس لے رہا ہے۔
استانی جی پانی پینے جاؤں، جوس پینے جاؤں، کولڈ ڈرنک پینے جاؤں۔
استانی جی لنچ کر لوں، ڈنر کر لوں، ناشتہ بھی کر لوں،
استانی جی واشروم جاؤں، دو بار جاؤں، دس بار جاؤں
استانی جی کاپی گھر رہ گئی ہے، بیگ گھر رہ گیا ہے، دماغ بھی پہ گھر رہ گیا ہے۔
استانی اوپر سے مسکرا کر بولتی ہے شاباش بیٹا اور اندر سے کہتی ہے،
یا اللہ مجھے صبر دے اور میرا مقام جنتیوں میں لکھ دینا میرے خدا ۔
پہلا پیریڈ ختم ہوتے ہی منتظمہ انٹری مارتی ہیں واہ شاباش کلاس میں تو قبرستان کا سکوت ہے۔ بچوں بتاؤ سبق آیا؟
استانی اچھا پڑھاتی ہے؟
مارتی تو نہیں ناں؟
منتظمہ کے نکلتے ہی شور استانی جی وقفہ کب ہو گا؟ استانی جی آج کھیل کب شروع ہو گا؟
استانی جی آج چھٹی کب ہو گی؟
دوپہر کو سرپرست تشریف لاتے ہیں استانی صاحبہ میرے شہزادے کے چالیس فیصد نمبر کیوں آئے؟
استانی رجسٹر کھولتی ہے جناب مہینے میں پچیس چھٹیاں، گھر کا کام زیرو، کلاس میں باتیں ہزار۔
سرپرست جواب دیتے ہیں کوئی بات نہیں آپ استانی ہیں نا، جادو کر دیں۔ اور ہاں فیس میں پانچ ہزار رعایت بھی کر دیں۔
چھٹی کے بعد موبائل کی گھنٹی بجتی ہے،
انتظامیہ!
کل بڑی تقریب ہے۔ سٹیج، لائٹ، ساؤنڈ، ڈانس، تقریر اور مہمانوں کی چائے بھی آپ سنبھالیں گی۔
سرپرست استانی جی میرے بچے کو الگ ٹیوشن، الگ توجہ، الگ دعائیں دیں۔
حساب والا!
تنخواہ پچیس کو آئے گی۔ اس ماہ بجٹ میں صرف دعائیں ہیں۔
استانی چھت کی طرف دیکھ کر بولتی ہے یا اللہ مجھے صبر دے یا اللہ میں قوم کی معمار ہوں، میری اپنی عمارت کب بنے گی؟
نجی اسکول کی ڈکشنری!
داخلے کے وقت ہمارے پاس کھیل کے میدان، سوئمنگ پول، اے سی کلاس، روبوٹ لیب، ہیلی کاپٹر گاڑی پتہ نہیں کیا کیا،
حقیقت!
ایک ہلتا ہوا پنکھا، تین ٹوٹی کرسیاں، اور دیوار پر لکھا ہوا ایک چارٹ خاموشی قوم کی پہچان ہے.
اور دوسرا چارٹ،
اللّٰہ صبر کرنے والوں کے ساتھ ہے۔
فیس لیٹ ہو!
روز پانچ بار کال، آپ کے بچے کا مستقبل، ماضی اور حال سب خطرے میں ہے
تنخواہ لیٹ ہو بیٹا صبر کرو، اللہ دیکھ رہا ہے۔
مطلب،
بچہ چھٹی کرے قصور استانی کا۔
استانی لیٹ ہو قصور استانی کا،
ماں باپ کی بات نہ مانے قصور استانی کا،
ہوم ورک نہ کرے قصور استانی کا،
بارش ہو جائے قصور استانی کا،
اور تنخواہ نہ آئے تو یہ کہہ کر جان چھڑا لو کہ آپ کا رتبہ بہت اعلیٰ ہے۔
معلم کا معاوضہ بھلا دے ہی کون سکتا ہے؟
تنخواہ تو نہیں ہے اس مہینے
اللّٰہ آپ کو جزائے خیر ہی دے۔
پرائیویٹ اسکول کی استانی زندہ باد

ناہید اختر: خاموشی میں لپٹی ہوئی ایک لازوال داستان.سلیم خان ہیوسٹن (ٹیکساس) امریکا

وزیرِ اعلیٰ گلگت بلتستان نے جگلوٹ سکردو روڈ کی بحالی پر انتظامیہ کو خراجِ تحسین پیش کیا
column in urdu Private School Teacher