عنوان: میچیورٹی کیا ہے؟ کب انسان میں آتا ہے؟ محمد دلاور بلتستانی
میچیورٹی یعنی Maturity صرف عمر بڑھنے کا نام نہیں بلکہ سوچ رویے اور کردار میں آنے والی پختگی کا نام ہے۔ انسان عمر کے ساتھ بڑا تو ہو جاتا ہے لیکن ضروری نہیں کہ اس کی سوچ بھی اسی رفتار سے بڑی ہو۔ اصل میچیورٹی اس وقت آتی ہے جب انسان کو یہ سمجھ آ جائے کہ ہر بات کا جواب دینا ضروری نہیں ہر بحث میں جیتنا ضروری نہیں اور ہر الزام کی وضاحت دینا بھی ضروری نہیں۔ زندگی میں ایک وقت ایسا آتا ہے جب انسان دوسروں کو قائل کرنے کے بجائے خود کو سمجھنے لگتا ہے۔ اگر کوئی آپ کو برا بھلا کہے غلط سمجھے یا آپ کے بارے میں کوئی ایسی بات کرے جو حقیقت نہیں تو آپ ہر بار وضاحت دینے کے بجائے خاموش رہ کر آگے بڑھ جاتے ہیں۔ اس کا مطلب یہ نہیں کہ آپ واقعی ویسے ہی ہیں جیسے دوسرا شخص آپ کو کہہ رہا ہے بلکہ اصل بات یہ ہے کہ اب وہ بات آپ کے لیے اتنی اہم نہیں رہی کہ آپ اپنا سکون برباد کرکے ہر شخص کو جواب دیتے پھریں۔ کبھی کبھی خاموشی کمزوری نہیں بلکہ انسان کی پختگی ہوتی ہے۔ زندگی میں شور بہت ہوگا۔ لوگ آپ کے بارے میں باتیں کریں گے آپ پر تنقید کریں گے آپ کو غلط سمجھیں گے اور کبھی کبھی آپ کی راہ میں رکاوٹیں پیدا کرنے کی کوشش بھی کریں گے۔ یہ بالکل ایسے ہی ہے جیسے گاڑی کے پیچھے کچھ فاصلے تک کتا بھونکتا اور دوڑتا رہتا ہے۔ نہ وہ گاڑی چھیننا چاہتا ہے نہ اسے گاڑی میں بیٹھنا ہے اور نہ ہی اسے گاڑی چلانی آتی ہے۔ وہ صرف شور کرتا ہے جبکہ گاڑی اپنی منزل کی طرف چلتی رہتی ہے۔ زندگی میں بھی کچھ لوگ صرف شور کرتے ہیں۔ آپ کا کام ہر آواز کی طرف مڑ کر دیکھنا نہیں بلکہ اپنی سمت اور اپنی منزل کی طرف دیکھتے رہنا ہے۔ کیونکہ جس شخص کی نظر اپنی منزل پر ہو وہ راستے کے ہر شور پر رک نہیں جاتا۔ زندگی ہر انسان کو کچھ نہ کچھ زخم ضرور دیتی ہے۔ کچھ زخم جسم پر ہوتے ہیں اور کچھ دل اور روح پر۔ کبھی کسی کے الفاظ انسان کو اندر سے توڑ دیتے ہیں کبھی کسی کا رویہ کبھی دھوکہ اور کبھی اپنوں کی بے وفائی انسان کے اندر بہت کچھ بدل دیتی ہے۔ لیکن زخم انسان کو بدل سکتے ہیں ضروری نہیں کہ وہ انسان کو برا بھی بنا دیں۔ آپ کو تلخ نہیں ہونا۔ بدلہ لینے والا نہیں بننا۔ چالیں چلنے والا یا دوسروں کے لیے جال بچھانے والا نہیں بننا۔ اگر کسی نے آپ کے لیے گڑھا کھودا ہے تو ضروری نہیں کہ آپ بھی اس کے لیے گڑھا کھودیں۔ کیونکہ آپ کی اصل پہچان یہ نہیں کہ لوگوں نے آپ کے ساتھ کیا کیا بلکہ یہ ہے کہ آپ نے ان کے ساتھ کیا کیا۔ کچھ درد وقت کے ساتھ کم نہیں ہوتے بلکہ رب کے سپرد کرنے سے ہلکے ہوتے ہیں۔ اگر کسی نے آپ کو تکلیف دی ہے تو ہر وقت اس کا بدلہ لینے کے بارے میں سوچتے رہنا آپ کے اپنے دل کو مزید تھکا دیتا ہے۔ اس لیے کچھ لوگوں کو ان کے حال پر چھوڑ دینا ہی بہتر ہے۔ جو ہوا اسے جانے دیں۔ جس نے جو کیا اسے رب کے سپرد کریں اور اپنے پیچھے ماضی کے دروازے بند کرکے آگے بڑھ جائیں۔ جن لوگوں نے آپ کو تکلیف دی ان سے بدلہ لینے کے بجائے اپنا حال بہتر کریں کیونکہ کبھی کبھی سب سے خوبصورت جواب یہ ہوتا ہے کہ آپ دوسروں کی دی ہوئی تکلیف کے باوجود ایک اچھے انسان بنے رہیں۔ اصل Maturity یہ ہے کہ آپ کو معلوم ہو کہ کہاں بولنا ہے اور کہاں خاموش رہنا ہے۔ کس بات کو دل پر لینا ہے اور کس بات کو نظر انداز کرنا ہے۔ کس انسان کو جواب دینا ہے اور کس انسان کو وقت کے حوالے کر دینا ہے۔ میچیورٹی یہ بھی ہے کہ آپ اپنی کامیابی کے لیے کسی کو گرانا ضروری نہ سمجھیں۔ آپ کسی کے برے رویے کی وجہ سے اپنا کردار خراب نہ کریں اور کسی کی نفرت کو اپنے اندر نفرت پیدا کرنے کا سبب نہ بننے دیں۔ حالات جیسے بھی ہوں اپنی اصل کو مت بدلنے دیں کیونکہ آپ کو وہ نہیں بننا جو حالات آپ کو بنا رہے ہیں بلکہ آپ کو وہ بننا ہے جو آپ کے اعمال آپ کو بناتے ہیں۔ زندگی بہت مختصر ہے۔ اسے ہر شخص کو وضاحتیں دیتے ہر الزام کا جواب دیتے اور ہر بات پر بحث کرتے ہوئے ضائع نہ کریں۔ اپنی منزل پر نظر رکھیں۔ اپنے دل کو صاف رکھیں۔ اپنے کردار کو مضبوط رکھیں اور اپنے معاملات رب کے سپرد کرتے جائیں۔ کچھ لوگ راستے میں صرف شور کرنے کے لیے آتے ہیں۔ کچھ آپ کو گرانے کے لیے آتے ہیں اور کچھ آپ کو یہ سکھانے کے لیے آتے ہیں کہ خاموشی صبر اور اللہ پر بھروسہ کتنا قیمتی ہے۔ اس لیے آگے بڑھتے رہیں۔ نہ تلخی کو اپنا مزاج بنائیں اور نہ بدلے کو اپنی زندگی کا مقصد۔ رب کا بندہ بننے کی کوشش کریں۔ کیونکہ ایک سچا بندہ مومن وہی ہے جو حالات کے باوجود اپنے کردار اخلاق اور انسانیت کو زندہ رکھے۔ آخرکار انسان کی سب سے بڑی کامیابی یہ نہیں کہ اس نے کتنے لوگوں کو جواب دیا بلکہ یہ ہے کہ زندگی نے اسے کتنی بار آزمایا اور وہ ہر آزمائش کے بعد بھی ایک اچھا انسان بن کر کھڑا رہا۔

ڈاکٹر تنویر انور خان کی کتاب پانی کا بلبلہ پر تبصرہ . پانی کا بلبلہ، عبدالحفیظ شاہد واہ کینٹ

What Is Maturity