گلگت بلتستان کو عبوری صوبائی حیثیت دینے سے متعلق مشترکہ قرارداد کی متفقہ منظوری کا خیرمقدم کرتے ہوئے اسے ایک تاریخی، اہم اور عوامی امنگوں کی ترجمان پیش رفت قرار دیا ہے سعدیہ دانش
رپورٹ، 5 سی این نیوز
گلگت پاکستان پیپلز پارٹی گلگت بلتستان کی سیکریٹری اطلاعات و رکن گلگت بلتستان اسمبلی سعدیہ دانش نے گلگت بلتستان اسمبلی کی جانب سے گلگت بلتستان کو عبوری صوبائی حیثیت دینے سے متعلق مشترکہ قرارداد کی متفقہ منظوری کا خیرمقدم کرتے ہوئے اسے ایک تاریخی، اہم اور عوامی امنگوں کی ترجمان پیش رفت قرار دیا ہے۔
انہوں نے اپنے بیان میں کہا کہ گلگت بلتستان اسمبلی کے تمام اراکین کی جانب سے اس اہم قرارداد کی متفقہ منظوری اس امر کا واضح ثبوت ہے کہ گلگت بلتستان کے عوام کے آئینی، سیاسی اور جمہوری حقوق کے معاملے پر پوری اسمبلی ایک آواز ہے۔ یہ قرارداد نہ صرف عوامی خواہشات کی عکاس ہے بلکہ خطے کے مستقبل سے متعلق ایک مثبت اور امید افزا پیش رفت بھی ہے۔
سعدیہ دانش نے کہا کہ پاکستان پیپلز پارٹی نے ہمیشہ گلگت بلتستان کے عوام کے آئینی، سیاسی اور جمہوری حقوق کی حمایت کی ہے۔ شہید ذوالفقار علی بھٹو نے گلگت بلتستان کے عوام کو بنیادی حقوق اور شناخت فراہم کرنے کی بنیاد رکھی، جبکہ شہید محترمہ بینظیر بھٹو نے اس جدوجہد کو آگے بڑھایا۔ چیئرمین پاکستان پیپلز پارٹی بلاول بھٹو زرداری بھی مسلسل گلگت بلتستان کے عوام کو قومی سطح پر باوقار نمائندگی، آئینی تحفظ اور دیگر صوبوں کے مساوی حقوق کی فراہمی کے لیے آواز بلند کرتے رہے ہیں۔
انہوں نے کہا کہ عبوری صوبائی حیثیت سے متعلق اس قرارداد کی منظوری گلگت بلتستان کے عوام کی طویل جدوجہد کا اہم سنگ میل ہے۔ اس اقدام سے نہ صرف عوام کو قومی سیاسی دھارے میں مزید مؤثر نمائندگی کا موقع ملے گا بلکہ ترقی، وسائل کی منصفانہ تقسیم، ادارہ جاتی استحکام اور آئینی تحفظ کی راہ بھی مزید ہموار ہوگی۔
سعدیہ دانش نے اس عزم کا اظہار کیا کہ پاکستان پیپلز پارٹی گلگت بلتستان کے عوام کے حقوق کے تحفظ، آئینی شناخت اور بااختیار مستقبل کے لیے ہر سطح پر اپنی جدوجہد جاری رکھے گی۔ انہوں نے وفاقی حکومت، متعلقہ آئینی اداروں اور تمام سیاسی قوتوں پر زور دیا کہ وہ گلگت بلتستان اسمبلی کے متفقہ مؤقف اور عوامی امنگوں کا احترام کرتے ہوئے عبوری صوبائی حیثیت سے متعلق آئینی و قانونی اقدامات کو جلد از جلد عملی شکل دیں تاکہ گلگت بلتستان کے عوام کو ان کے جائز، آئینی اور جمہوری حقوق میسر آسکیں۔
انہوں نے کہا کہ پاکستان پیپلز پارٹی اس تاریخی پیش رفت کو گلگت بلتستان کے روشن، بااختیار اور مستحکم مستقبل کی جانب ایک اہم قدم سمجھتی ہے اور امید رکھتی ہے کہ قومی اتفاقِ رائے کی بنیاد پر اس دیرینہ مطالبے کو جلد عملی جامہ پہنایا جائے گا۔
خاموش لوگوں کی چیخیں. وہ مسائل جو کبھی خبروں کی زینت نہیں بنتے؟ انجینیئر علی رضوان چوہدری
کھرمنگ میں چراگاہ کے تنازع پر خونریز تصادم، 3 افراد جاں بحق، متعدد زخمی، احتجاج جاری
urdu news update Gilgit-Baltistan’s Interim Provincial Status
