شگر محکمہ مواصلات و تعمیراتِ عامہ میں بھرتیوں میں تاخیر، ہزاروں نوجوان پریشان
رپورٹ، عابد شگری 5 سی این نیوز
، محکمہ مواصلات و تعمیراتِ عامہ گلگت بلتستان میں مشتہر شدہ آسامیوں پر بھرتیوں کے عمل میں مبینہ تاخیر کے باعث ہزاروں تعلیم یافتہ نوجوانوں میں تشویش پائی جاتی ہے۔ امیدواروں نے حکومت اور متعلقہ حکام سے فوری طور پر ٹیسٹ اور انٹرویوز کا شیڈول جاری کرنے کا مطالبہ کیا ہے۔ امیدواروں کا کہنا ہے کہ وہ مذکورہ آسامیوں کے لیے چار مرتبہ درخواستیں جمع کرا چکے ہیں، تاہم بھرتی کے مراحل میں تاحال خاطر خواہ پیش رفت نہیں ہو سکی۔ طویل انتظار کے باعث روزگار کے خواہش مند نوجوان غیر یقینی، ذہنی اذیت اور مایوسی کا شکار ہیں۔ متاثرہ امیدواروں کے مطابق محکمہ مواصلات و تعمیراتِ عامہ میں خالی آسامیوں پر بروقت بھرتیوں سے نہ صرف بے روزگار نوجوانوں کو روزگار کے مواقع میسر آئیں گے بلکہ محکمہ کی افرادی قوت میں بھی اضافہ ہوگا، جس سے سرکاری امور اور ترقیاتی منصوبوں کی کارکردگی بہتر بنانے میں مدد مل سکتی ہے۔ انہوں نے حکومتِ گلگت بلتستان اور متعلقہ حکام سے مطالبہ کیا کہ بھرتیوں کے عمل کو شفاف اور میرٹ کی بنیاد پر آگے بڑھاتے ہوئے فوری طور پر ٹیسٹ اور انٹرویوز کا شیڈول جاری کیا جائے، تاکہ امیدواروں میں پائی جانے والی بے چینی کا خاتمہ ہو سکے۔ نوجوانوں نے اپیل کی کہ روزگار کے منتظر ہزاروں امیدواروں کے مستقبل سے وابستہ اس معاملے کو مزید التوا کا شکار نہ بنایا جائے اور بھرتیوں کا عمل جلد از جلد مکمل کیا جائے۔