مونٹینیرنگ انسٹیٹیوٹ شگر گلگت بلتستان کے نوجوانوں کے روشن مستقبل کی جانب ایک اہم قدم، راجہ ناصر علی خان مقپون صوبائی وزیر جنگلات و زراعت گلگت بلتستان

مجھے یہ خوشی ہے کہ ہمارا ایک دیرینہ خواب، مونٹینیرنگ انسٹیٹیوٹ شگر، اب پایۂ تکمیل تک پہنچ چکا ہے اور ان شاء اللہ آئندہ چند روز میں اس کا ٹینڈر بھی جاری ہونے جا رہا ہے۔ یہ منصوبہ گلگت بلتستان کے نوجوانوں کے لیے ہمارا ایک ڈریم پروجیکٹ تھا، جس کا مقصد ایڈونچر ٹورازم، ماؤنٹینیرنگ اور ہاسپیٹلٹی کے شعبوں میں عالمی معیار کی تربیت فراہم کرنا ہے۔ گزشتہ پانچ سالوں کے دوران مجھے اس منصوبے سے بطور ممبر وابستہ رہنے کا موقع ملا، اور اس کی تکمیل کے لیے مسلسل کوششیں کی گئیں۔
میں وفاقی حکومت، خصوصاً وزیرِ اعظم پاکستان کا تہہ دل سے شکر گزار ہوں جنہوں نے اس منصوبے کی تکمیل میں بھرپور تعاون کیا۔ اللہ تعالیٰ کے فضل و کرم سے آج یہ منصوبہ عملی شکل اختیار کر چکا ہے اور ٹینڈر کے مرحلے میں داخل ہو رہا ہے۔ میں گلگت بلتستان کے تمام عوام کو، بالخصوص ایڈونچر اور ماؤنٹینیرنگ کے شوقین نوجوانوں کو دل کی گہرائیوں سے مبارکباد پیش کرتا ہوں۔ یہ ایک مکمل اور جدید انسٹیٹیوٹ ہوگا، جہاں عالمی معیار کی تربیت، جدید سرٹیفکیشن، رہائشی ہاسٹل اور راک کلائمبنگ وال سمیت تمام ضروری سہولیات دستیاب ہوں گی۔ ان شاء اللہ، اس منصوبے کی تکمیل کے بعد ہماری کوشش ہوگی کہ اس ادارے کو کسی بین الاقوامی ادارے کے ساتھ الحاق (Affiliation) دلایا جائے تاکہ یہاں سے حاصل کی جانے والی تربیت اور سرٹیفکیٹس عالمی سطح پر تسلیم کیے جائیں اور ہمارے نوجوانوں کو دنیا بھر میں بہتر مواقع میسر آئیں۔
میں اس موقع پر اہلیان لمسا اور کوتھنگ کا خصوصی شکریہ ادا کرتا ہوں جنہوں نے اس منصوبے کے لیے زمین کی فراہمی میں بھرپور تعاون کیا۔ ضلع شگر کے معزز عوامی نمائندوں راجہ اعظم خان صاحب اور عمران ندیم صاحب کا بھی تہہ دل سے شکریہ ادا کرتا ہوں، جنہوں نے اس منصوبے کی تکمیل کے لیے ہر مرحلے پر بھرپور تعاون کیا۔
اسی طرح سرباز خان اور نائلہ کیانی بھی خصوصی خراجِ تحسین کے مستحق ہیں، جنہوں نے اس منصوبے کی منظوری کے لیے وزیرِ اعظم پاکستان تک مؤثر انداز میں معاملہ پہنچانے اور اس کی منظوری میں اہم کردار ادا کیا۔ ان شاء اللہ، ہماری بھرپور کوشش ہوگی کہ اس ادارے میں پیدا ہونے والے روزگار کے مواقع میں لمسا اور کوتھنگ کے نوجوانوں کو ترجیح دی جائے تاکہ مقامی آبادی بھی اس منصوبے کے ثمرات سے بھرپور استفادہ کر سکے۔
اللہ تعالیٰ سے دعا ہے کہ یہ ادارہ گلگت بلتستان کے نوجوانوں کے لیے ترقی، روزگار اور عالمی کامیابیوں کا ذریعہ بنے۔ آمین۔راجہ ناصر علی خان مقپون صوبائی وزیر جنگلات و زراعت گلگت بلتستان

Mountaineering Institute Shigar

عنوان: میں کیا بننا چاہتا ہوں؟ محمد دلاور بلتستانی