شگر کی تعمیر و ترقی ان کی اولین ترجیح ہے۔ جب بھی عوام نے خدمت کا موقع دیا، اپنی بساط سے بڑھ کر عوامی مسائل کے حل اور علاقے کی ترقی کے لیے کردار ادا کرنے کی کوشش کی. سپیکر گلگت بلتستان اسمبلی عمران ندیم
شگر, سپیکر گلگت بلتستان اسمبلی عمران ندیم نے کہا ہے کہ شگر کی تعمیر و ترقی ان کی اولین ترجیح ہے۔ جب بھی عوام نے خدمت کا موقع دیا، اپنی بساط سے بڑھ کر عوامی مسائل کے حل اور علاقے کی ترقی کے لیے کردار ادا کرنے کی کوشش کی۔ شگر کو لوڈشیڈنگ فری ضلع بنانا ان کا مشن ہے اور ان شاء اللہ چھورکاہ میں مائیکرو ہائیڈرو پاور پلانٹ کے ذریعے بجلی کی فراہمی یقینی بنائی جائے گی، جبکہ تعلیم کے شعبے پر بھی خصوصی توجہ دی جائے گی۔
وہ پیپلز پارٹی چھورکاہ کی جانب سے بھاری اکثریت سے منتخب ہونے اور آئینی عہدہ ملنے کی خوشی میں منعقدہ ایک پروقار استقبالیہ تقریب سے خطاب کر رہے تھے۔
عمران ندیم نے کہا کہ شگر کی ترقی دراصل ہم سب کی ترقی ہے۔ جب بھی عوام نے انہیں خدمت کا موقع دیا، انہوں نے تعلیم، انفراسٹرکچر، پانی اور بجلی سمیت بنیادی مسائل کے حل کو ترجیح دی۔ پہلی مرتبہ منتخب ہونے کے بعد انٹر کالج کا منصوبہ منظور کرایا، جبکہ دوسری مرتبہ منتخب ہونے پر گرلز ڈگری کالج شگر کے منصوبے کو عملی شکل دی گئی۔
انہوں نے کہا کہ الحمدللہ اب تیسری مرتبہ عوام کی خدمت کا موقع ملنے پر گرلز ڈگری کالج شگر کا افتتاح کرنے جا رہے ہیں، جہاں یکم ستمبر سے باقاعدہ کلاسز کا آغاز ہوگا۔ انہوں نے مزید بتایا کہ شگر کے فرزند پروفیسر محمد بشیر شگری کو گرلز ڈگری کالج شگر کا پرنسپل تعینات کر دیا گیا ہے۔
سپیکر عمران ندیم نے کہا کہ شگر بالخصوص چھورکاہ کو درپیش مسائل سے وہ بخوبی آگاہ ہیں۔ مسائل بہت ہیں، تاہم ان کے حل کے لیے بھرپور کوششیں جاری رکھی جائیں گی۔ انہوں نے کہا کہ اگر سو فیصد وعدوں کی تکمیل ممکن نہ ہوسکی تو کم از کم 60 فیصد وعدوں کو عملی جامہ پہنانے کی بھرپور کوشش کی جائے گی۔
انہوں نے کہا کہ چھورکاہ میں لوڈشیڈنگ کے خاتمے کے لیے پرعزم ہیں اور علاقے کو مائیکرو ہائیڈرو پاور منصوبے کے ذریعے بجلی فراہم کی جائے گی۔ اس سلسلے میں اے کے آر ایس پی (AKRSP) جلد سروے مکمل کرکے منصوبے پر کام شروع کرے گا۔
عمران ندیم نے کہا کہ چھورکاہ کے تعلیمی مسائل بھی ترجیحی بنیادوں پر حل کرنے کی کوشش کی جائے گی اور علاقے کے نوجوانوں کو بہتر تعلیمی مواقع فراہم کرنا حکومت کی ترجیحات میں شامل ہے۔
تقریب کے اختتام پر سپیکر عمران ندیم نے چھورکاہ کے علمائے کرام، سرکردگان، نوجوانوں، ماؤں اور بہنوں کا پرتپاک استقبال اور بھرپور اعتماد پر شکریہ ادا کیا۔
Development and Progress of Shigar
