تانا زِندگی بتول فاطمہ
مجھے یہ لفظ، “تانا بانا”، ہمیشہ سے ایک عجیب کشش رکھتا محسوس ہوا۔ ایک دن میں نے سوچا کہ آخر یہ تانا بانا ہے کیا؟ تو معلوم ہوا کہ کپڑا بننے کے عمل میں دو طرح کے دھاگے استعمال ہوتے ہیں۔ ایک سیدھائی میں، لمبائی کے رخ پر بچھائے جاتے ہیں، جنہیں “تانا” کہتے ہیں۔ دوسرے دھاگے انہی کے آر پار، عرض کے رخ پر گزارے جاتے ہیں، جنہیں “بانا” کہتے ہیں۔ یہی دونوں جب ایک دوسرے میں پروئے جاتے ہیں، باری باری اوپر نیچے گزرتے ہیں، تب جا کر ایک مضبوط، باریک، اور خوبصورت کپڑا تیار ہوتا ہے۔ کوئی ایک دھاگہ اکیلا کچھ نہیں بن سکتا۔ کپڑا بننے کے لیے تانے اور بانے، دونوں کا آپس میں الجھنا ضروری ہے۔
یہ جان کر مجھے لگا جیسے کسی نے زندگی کی پوری حقیقت دو لفظوں میں سمو دی ہو۔
زندگی بھی ایک تانا بانا ہی تو ہے۔ رشتے بھی اسی طرح بنتے ہیں کوئی دھاگہ تانے کی طرح سیدھا، کوئی بانے کی طرح آڑا، اور دونوں مل کر ایک پورا کپڑا، ایک پورا رشتہ تشکیل دیتے ہیں۔ مگر جیسے دھاگے بُنائی میں کبھی الجھ جاتے ہیں، ویسے ہی رشتے بھی الجھ جاتے ہیں۔ کبھی غلط فہمی کا ایک دھاگہ آڑا آ جاتا ہے، کبھی انا کا دھاگہ کسی اور دھاگے سے لپٹ جاتا ہے، اور پھر سلجھانے کی ہر کوشش الجھن کو اور گہرا کر دیتی ہے۔
کچھ الجھنیں صبر سے، آہستگی سے کھل جاتی ہیں۔ مگر کچھ دھاگے اتنی بری طرح الجھ جاتے ہیں کہ انہیں سلجھایا نہیں جا سکتا انہیں کاٹنا پڑتا ہے۔ کاٹنا بھی ایک تکلیف ہے، مگر بعض اوقات یہی واحد راستہ بچتا ہے، ورنہ پورا کپڑا، پورا رشتہ، بے ڈھنگا اور بے کار ہو جاتا ہے۔
اور میں نے کچھ لوگوں کو دیکھا ہے جو اپنی گرہ اتنی زور سے لگا دیتے ہیں، رشتے کی ڈور اتنی سختی سے باندھ دیتے ہیں، کہ بعد میں وہی گرہ کھولنے کے لیے دانتوں سے کترنی پڑتی ہے۔ ہاتھ ناکام ہو جاتے ہیں، انگلیاں تھک جاتی ہیں، اور پھر مجبوراً دانتوں کا سہارا لینا پڑتا ہے، جیسے زندگی کی کچھ گرہیں نرمی سے نہیں، تکلیف اور ضد سے ہی کھلتی ہیں۔
شاید یہی تانا بانا ہے زندگی کا، رشتوں کا، اور انسان کے اندر چھپی اس کمزور مگر ضدی ڈور کا، جو بنتی بھی ہے، الجھتی بھی ہے، اور کبھی کبھی ٹوٹ کر ہی سکون پاتی ہے۔
جنم دن ، 10 اگست محترم المقام سر سلیم خان کی نذر ہدیہ عقیدت
چوکس اور چونچال کا فرق. سلیم خان ہیوسٹن (ٹیکساس) امریکا
وہ شجر جس کے سائے میں لفظ پناہ لیتے ہیں. یاسمین اختر طوبیٰ ریسرچ اسکالر گوجرہ، پاکستان
Burden of Life |
