حکومت کی جانب سے سبسڈائزڈ گندم کی ماہانہ مقدار میں کمی کے فیصلے کو مسترد ، عوامی مفاد میں اس فیصلے کو فوری طور پر واپس لیا جائے اور فی کس ماہانہ ساڑھے سات کلوگرام سبسڈائزڈ گندم کا کوٹہ بدستور برقرار رکھا جائے ، اخوند ظہیر شگری اویئرنیس فورم شگر
رپورٹ، 5 سی این نیوز
شگر معروف سماجی شخصیت اور اویئرنیس فورم شگر کے چیئرمین محمد ظہیر عباس نے حکومت کی جانب سے سبسڈائزڈ گندم کی ماہانہ مقدار میں کمی کے فیصلے کو مسترد کرتے ہوئے مطالبہ کیا ہے کہ عوامی مفاد میں اس فیصلے کو فوری طور پر واپس لیا جائے اور فی کس ماہانہ ساڑھے سات کلوگرام سبسڈائزڈ گندم کا کوٹہ بدستور برقرار رکھا جائے۔ اپنے ایک بیان میں انہوں نے کہا کہ سبسڈائزڈ گندم کی مقدار میں کمی سے ضلع شگر سمیت گلگت بلتستان کے غریب اور متوسط طبقے پر اضافی مالی بوجھ پڑے گا۔ ان کا کہنا تھا کہ مہنگائی کے موجودہ دور میں عوام پہلے ہی شدید معاشی مشکلات کا شکار ہیں، ایسے میں سبسڈی میں کمی کا فیصلہ عوامی مفاد کے منافی ہے۔ محمد ظہیر عباس نے کہا کہ حکومت نے عوام کو ریلیف فراہم کرنے کے بجائے سبسڈائزڈ گندم کا کوٹہ کم کرکے مایوس کیا ہے۔ انہوں نے حکومت سے مطالبہ کیا کہ وہ فوری طور پر اس فیصلے پر نظرثانی کرے اور سابقہ پالیسی کے مطابق فی کس ماہانہ ساڑھے سات کلوگرام گندم کی فراہمی بحال کرے۔ انہوں نے خبردار کیا کہ اگر حکومت نے اپنا فیصلہ واپس نہ لیا تو عوام احتجاج پر مجبور ہوں گے۔ ان کے بقول، اس سلسلے میں 2014 اور 2020 کے احتجاجی دھرنوں سے بھی بڑا دھرنا دیا جائے گا، جس کی تمام تر ذمہ داری حکومت پر عائد ہوگی۔ انہوں نے مزید کہا کہ اویئرنیس فورم شگر عوامی حقوق کے تحفظ کے لیے ہر آئینی اور جمہوری فورم پر آواز بلند کرتا رہے گا اور عوام کو درپیش بنیادی مسائل کے حل کے لیے اپنی جدوجہد جاری رکھے گا۔

urdu news update Rejects Government’s Decision to Reduce the Monthly Quota