گلگت بلتستان کے مشہور پھل خوبانی اور اس کے فوائد. آمینہ یونس،بلتستانی
گلگت بلتستان میں خوبانی کا درخت کثرت سے پایا جاتا ہے۔ اس میں دو قسم کی گیری ہوتی ہے: کڑوی اور میٹھی۔ پہلے زمانے میں کڑوی گیری والی خوبانی زیادہ ہوتی تھی، مگر بدلتے وقت کے ساتھ لوگوں نے پیوند کاری کے ذریعے کڑوی گیری کو میٹھی اقسام میں تبدیل کر لیا۔ اس کی کئی اقسام ہیں جو جولائی کے آغاز میں پکنا شروع ہو جاتی ہیں۔ ماضی میں لوگ اسے استعمال میں کم لاتے تھے، اس وقت اس کی کوئی خاص قیمت بھی نہ تھی، اس لیے گٹھلی نکال کر باقی خوبانی یا تو پانی میں بہا دیتے یا خشک کر کے مویشیوں کو کھلا دیتے تھے، کم ہی لوگ اسے کھانے میں استعمال کرتے تھے۔ مگر اب شعور بیدار ہو چکا ہے، اور جب یہ چیز مارکیٹ میں آئی تو اس کی قیمت لگنے لگی، یوں گلگت بلتستان کے لوگوں نے اس پر خاص توجہ دینا شروع کر دی۔ اب کوئی ایک بھی خوبانی ضائع نہیں کرتا، کیونکہ یہ ایک اہم ذریعۂ آمدن بن چکی ہے۔ لوگ سیزن میں بیس تیس ہزار، سے لے کر لاکھوں تک کما لیتے ہیں، اگرچہ اس میں محنت بھی بہت زیادہ درکار ہوتی ہے۔
خوبانی کو پہلے درخت سے اتارا جاتا ہے، پھر گٹھلی سے الگ کیا جاتا ہے، اور ایک ایک دانہ فاصلے سے دھوپ میں سکھانے کے لیے رکھا جاتا ہے۔ اس مقصد کے لیے لکڑی کے مخصوص فریم بنائے جاتے ہیں، جبکہ بعض لوگ بڑے پتھروں پر بھی اسے سکھاتے ہیں۔ جب تک درخت پر خوبانی ہوتا ہے، لوگ مسلسل دھوپ میں محنت کرتے ہوئے خوبانی اور گٹھلیاں الگ کرتے رہتے ہیں۔ خشک ہونے کے بعد اسے باریک لکڑی کی بنی ٹوکریوں یا تھیلوں میں ڈال کر محفوظ کیا جاتا ہے۔ جو خوبانیاں بارش یا کسی اور وجہ سے خراب ہو جائیں، تو انہیں الگ کر کے سردیوں میں بھیڑ بکریوں کو کھلایا جاتا ہے، کیونکہ مقامی لوگوں کے مطابق اس سے جانوروں کو سردی کم لگتی ہے۔
خوبانی کے فوائد بے شمار ہیں۔ اسے تازہ بھی کھایا جاتا ہے، ستو کے ساتھ بھی استعمال کیا جاتا ہے، اور خشک ہونے کے بعد اس سے نہایت مزیدار شربت تیار کیا جاتا ہے۔ شربت بنانے کے لیے خوبانی کو دھو کر ایک برتن میں پانی ڈال کر پکایا جاتا ہے۔ جب وہ اچھی طرح گل جائے تو اسے چولہے سے اتار کر ٹھنڈا پانی ملایا جاتا ہے یا اسے ٹھنڈی جگہ رکھ کر ٹھنڈا کیا جاتا ہے۔ ٹھنڈا ہونے کے بعد اسے پینا نہایت لذت بخش ہوتا ہے، خاص طور پر گرمی یا تھکن کے وقت یہ جسم کو تازگی بخشتا ہے۔
خوبانی کو پکا کر بھی استعمال کیا جاتا ہے۔ جس برتن میں یہ پکتی ہے وہ شیشے کی طرح صاف ہو جاتا ہے، جس سے اندازہ لگایا جاتا ہے کہ یہ معدے کے لیے بھی کس قدر مفید ہے۔ پرانے لوگ اسے ایک بہترین دوا بھی مانتے تھے۔ ایک روایت کے مطابق جب بلتستان کے لوگ خوبانی لے کر لداخ جاتے اور وہاں سے نمک وغیرہ لاتے، تو ایک بار ایک شخص کو راستے میں شدید پیٹ درد ہوا۔ وہ ایک ہندو حکیم کے پاس گئے، جو اپنے فن میں ماہر تھا۔ اس نے دوا کے طور پر خوبانی تجویز کی۔ اس شخص نے کہا کہ یہ تو میرے پاس موجود ہے، تو حکیم نے اسے ملامت کرتے ہوئے کہا: “بے وقوف! بہترین دوا تمہارے پاس ہے اور تم اسے پہچانتے نہیں۔” کچھ لوگوں کا کہنا ہے یہ کینسر میں بھی مفید ہے ۔
خوبانی کی گٹھلی سے نکالی جانے والی میٹھی گیری نہایت طاقت بخش ہوتی ہے اور اسے ویسے ہی کھایا جاتا ہے، جبکہ کڑوی گیری سے تیل نکالا جاتا ہے۔ یہ تیل کولیسٹرول سے پاک سمجھا جاتا ہے اور بلڈ پریشر کے مریضوں کے لیے مفید ہے۔ اس کے علاوہ یہ تیل کھانوں میں، بالوں میں لگانے، اور جسمانی طاقت بڑھانے کے لیے بھی استعمال کیا جاتا ہے۔
یوں خوبانی قدرت کا ایک بے مثال تحفہ ہے، مگر افسوس کہ آج کل اس کا استعمال کم ہے جبکہ اس کے حقیقی فوائد سے بہت سے لوگ اب بھی ناواقف ہیں۔
urdu news update Famous Fruit of Gilgit-Baltistan: Apricot
سکردو بجلی کی بندش کے ساتھ موبائل سگنلز بھی غائب، عوام پریشان
پاکیزہ عشق . طہ علی تابشٓ بلتستانی
