بچوں کے لیے خوبصورت کہانیاں. طہٰ علی تابش بلتستانی
کہانی نمبر: 01
بندر اور چیونٹی کی دوستی
ایک چیونٹی اور بندر میں گہری دوستی تھی۔ وہ روزانہ جنگل کے ایک بڑے درخت کے نیچے بیٹھتے اور مل کر جنگل میں اپنی حکومت قائم کرنے کی نئی نئی تجاویز سوچتے تھے۔

ایک روز چیونٹی حسبِ معمول اپنے راستے سے درخت کی طرف جا رہی تھی کہ اچانک اس کی ملاقات لومڑی سے ہوئی۔ لومڑی نے پوچھا: “ارے میاں چیونٹی! کہاں جا رہے ہو؟”

چیونٹی نے جواب دیا: “میں درخت کے نیچے اپنے دوست بندر سے ملنے جا رہا ہوں۔ وہاں ہم جنگل میں اپنی حکومت قائم کرنے کی نئی نئی تجاویز پر غور کرتے ہیں۔”

لومڑی نے کچھ دیر سوچا اور کہا: “یہ تو بہت اچھی بات ہے! میں بھی تم لوگوں کا ساتھ دینے کے لیے تیار ہوں، بلکہ میں تو عمر بھر تمہارا وفادار بن کر رہنا چاہتا ہوں۔”

چیونٹی مسکرائی اور بولی: “یہ بات فی الحال ہم دونوں کے درمیان راز ہی رہنی چاہیے۔ جب ہم کامیاب ہو جائیں گے تو تمہیں بھی حکومت میں ایک اچھا عہدہ دیں گے۔”

لومڑی نے شکر گزار انداز میں سر جھکایا، چیونٹی کو خدا حافظ کہا اور سیدھی جنگل کے بادشاہ شیر کے پاس چلی گئی۔ اس نے بندر اور چیونٹی کے تمام منصوبے سے شیر کو آگاہ کر دیا۔
بادشاہ نے فوراً حکم دیا: “ان کی بیٹھک ختم ہونے سے پہلے پہلے ان کے ٹھکانوں کو تباہ کر دیا جائے اور انہیں گرفتار کر کے لایا جائے۔”

جب چیونٹی اور بندر اپنے اپنے گھر پہنچے تو وہاں شاہی سپاہی ان کا انتظار کر رہے تھے۔ سپاہیوں نے دونوں کو گرفتار کر کے بادشاہ کے سامنے پیش کیا، جہاں ان کے منصوبے کو ناکام بنا کر انہیں سخت سزا دی گئی۔

سبق:
بچو! راز داری میں ہی بقا ہے۔ اپنے اہم منصوبوں کا ذکر ہر کسی کے سامنے نہیں کرنا چاہیے، ورنہ حاسد اور چالاک لوگ آپ کو نقصان پہنچانے کی کوشش کرتے ہیں۔ نیز، کسی بھی بڑے مقصد کے لیے قدم اٹھانے سے پہلے اپنی حفاظت اور تدبیر کا مکمل انتظام کرنا ضروری ہے۔

Beautiful Stories for Children