پردیس میں رہنے والے سلیم انکل کے آج (10 اگست) بہت خاص دن یوم ولادت کے نام پر. تمنا ظفر
کچھ رشتے خون سے نہیں بنتے، وہ دل کی کسی خاموش ضرورت کے جواب میں زندگی خود ہمارے راستے میں رکھ دیتی ہے۔ آپ سے میرا تعلق بھی شاید ایسا ہی ایک تعلق ہے۔ جس میں اک بیٹی کا احساس بہت گہرا ہے؛
جس میں نسبت تو کوئی نہیں، مگر اپنائیت بہت ہے۔
پردیس میں رہ کر بھی آپ نے اپنے اندر کی مٹی کو مرنے نہیں دیا۔ آپ جہاں بھی رہے، اپنی زبان، اپنے ادب اور اپنی تہذیب کو اپنے ساتھ لے کر چلے۔ شاید پردیس کی سب سے بڑی آزمائش بھی یہی ہوتی ہے کہ انسان فاصلے تو طے کر لیتا ہے، مگر اپنی جڑوں کو ساتھ لے کر چلنا آسان نہیں ہوتا۔ آپ نے یہ کام صرف خود نہیں کیا بلکہ دوسروں کے لیے بھی راستہ روشن رکھا۔ اردو ادب سے آپ کی محبت محض کتابوں اور لفظوں تک محدود نہیں۔
آپ نے نوجوانوں کو آگے بڑھنے کا حوصلہ دیا، ان کے لفظوں کو جگہ دی، ان کی صلاحیتوں کو پہچانا اور ان کے سفر میں ایک سرپرست کی طرح ساتھ کھڑے رہے۔ یہ کام بظاہر بہت معمولی لگ سکتا ہے، مگر جو شخص خود لکھتا ہو وہ جانتا ہے کہ ایک نئے لکھنے والے کے لیے کسی بڑے شخص کا ایک حوصلہ افزا جملہ بھی کتنی بڑی دولت ہوتا ہے۔ کبھی کسی کی ایک تحریر پڑھ لینا، کبھی اصلاح کر دینا، کبھی کسی محفل میں جگہ دے دینا اور کبھی صرف یہ کہہ دینا کہ “لکھتے رہیے، آپ میں صلاحیت ہے”۔ یہی چھوٹی چھوٹی باتیں کسی نوجوان کے اندر ایک پوری دنیا آباد کر دیتی ہیں۔ کیسا لگتا ہے اس وقت وہ میں جانتی ہوں، اور شاید یہی آپ کی سب سے خوبصورت ادبی خدمت ہے۔ آپ صرف اردو کے قاری یا خدمت گار نہیں، آپ لفظوں کی اگلی نسل کے سرپرست ہیں۔ آپ نے نوجوانوں کو صرف پڑھنے اور لکھنے کی طرف نہیں بلایا، بلکہ انہیں یہ احساس بھی دیا کہ ان کی آواز اہم ہے، ان کا لفظ قیمتی ہے اور ان کے خوابوں کی بھی ادبی دنیا میں کوئی جگہ ہے۔ ایک بیٹی کی حیثیت سے میں شاید آپ کی خدمات پر کوئی بڑا فیصلہ نہ دے سکوں، مگر اتنا ضرور کہہ سکتی ہوں کہ آپ کی شفقت نے مجھے بھی کئی مواقع پر وہ حوصلہ دیا ہے جو شاید ایک باپ اپنی بیٹی کو دیتا ہے۔ آپ کی موجودگی میں ایک عجیب سا اعتماد محسوس تھا ۔ آپ تو وہ ہیں جو خاموشی سے پیچھے کھڑے؛ اور کہہ رہے:
“چلو، آگے بڑھو… میں دیکھ رہا ہوں۔” یہ احساس ہر کسی کے نصیب میں نہیں ہوتا۔ آج آپ کے جنم دن پر میری دعا ہے کہ پردیس کی دوریاں آپ کے دل میں موجود وطن کی محبت کو کبھی کم نہ کریں، زندگی کی مصروفیات آپ کی ادبی محبت کو کبھی ماند نہ پڑنے دیں، اور وقت آپ کے اندر موجود اس سرپرست کو کبھی تھکنے نہ دے جو آج بھی نوجوانوں کے خوابوں کو اپنے خوابوں کی طرح اہم سمجھتا ہے۔
خدا کرے آپ کے حصے میں بہت سی خوشیاں آئیں،
بہت سا سکون آئے، آمین ثم آمین۔
بہت سی محبتیں واپس لوٹ کر آئیں، اور وہ تمام دعائیں آپ کے دامن میں اترتی رہیں جو آپ نے خاموشی سے دوسروں کے لیے کی ہیں۔ آپ کی عمر کا ہر نیا سال صرف آپ کی زندگی میں اضافہ نہ کرے، بلکہ اردو ادب کے سفر میں بھی ایک نیا باب رقم کرے۔ اور آخر میں، ایک بیٹی کی طرف سے صرف اتنا کہ! آپ جہاں بھی رہیں، جس دیار میں بھی رہیں،
آپ کے لیے یہ احساس ہمیشہ قائم رہے کہ کہیں ایک بیٹی آپ کو باپ جیسی عزت، محبت اور دعا کے ساتھ یاد کرتی ہے۔
جنم دن بہت بہت مبارک ہو۔
اللہ آپ کو سلامت رکھے،
آپ کے لفظوں کو زندگی دے،
آپ کے قلم کو روشنی دے،
اور آپ کے ہاتھوں سے سنورنے والے نوجوان قلم کاروں کو آپ کی محبت، رہنمائی اور شفقت کا قرض
اپنی کامیابیوں سے چکانے کی توفیق دے۔
جنم دن کی بہت بہت مبارک ہو
جنم دن – 10 اگست محترم المقام سر سلیم خان کی نذر ہدیہ عقیدت
Special Birthday Tribute
