صنف: اسلامی سرگرمی . عنوان: خاموش انقلاب :بتول فاطمہ
ہر روز ہم اپنے اندر ایک خاموش انقلاب برپا کرتے ہیں۔ یہ انقلاب کسی میدان میں نعرے لگانے، کسی اجتماع میں تقریر کرنے یا دنیا کے سامنے اپنی کامیابی ثابت کرنے کا نام نہیں، بلکہ یہ وہ جنگ ہے جو انسان اپنے نفس اور ایمان کے درمیان لڑتا ہے۔ بظاہر کوئی ہمیں لڑتا ہوا نہیں دیکھتا، مگر ہمارے اندر ہر لمحہ ایک کشمکش جاری رہتی ہے۔
ہم نفس کے ساتھ جنگ کرتے ہیں، حالات کو مینیج کرتے ہیں، اپنے دماغ میں ہزاروں سوچوں کا شور برداشت کرتے ہیں۔ کبھی غربت پریشان کرتی ہے، کبھی لوگوں کے طعنے دل دکھاتے ہیں، کبھی اپنی کسی کمی کا احساس اندر سے توڑ دیتا ہے اور کبھی حالات ایسے سوال کھڑے کر دیتے ہیں جن کے جواب ہمارے پاس نہیں ہوتے۔ پھر بھی دل کے کسی کونے سے ایک آواز آتی ہے کہ ہمیں خود پر کام کرنا ہے، خود کو سنوارنا ہے، اپنی کمزوریوں پر قابو پانا ہے اور ایمان کو مضبوط رکھنا ہے۔
یہ جنگ بظاہر دکھائی نہیں دیتی، لیکن یہ اتنی بڑی جنگ ہے کہ انسان کو اندر سے زخمی کر دیتی ہے۔ اس کے زخم جسم پر نہیں بلکہ روح پر لگتے ہیں۔ جسم کے زخم دکھائی دیتے ہیں، ان کی دوا کی جاتی ہے، ان کے بھرنے میں وقت لگتا ہے اور بعض اوقات ان کے نشان بھی باقی رہ جاتے ہیں۔ مگر روح کے زخم خاموش ہوتے ہیں۔ ان کا درد چہرے پر ہمیشہ نظر نہیں آتا، انسان مسکراتا رہتا ہے، لوگوں سے بات کرتا ہے، اپنے فرائض نبھاتا ہے، مگر اندر کہیں کچھ ٹوٹ رہا ہوتا ہے۔
کبھی ہم اپنے نفس کو سمجھاتے ہیں کہ بدلہ نہ لو، کبھی غصے کو پی جاتے ہیں، کبھی کسی کی بات دل پر لے کر بھی معاف کر دیتے ہیں، کبھی اپنی خواہش قربان کر کے اللہ کی رضا کو ترجیح دیتے ہیں۔ یہی چھوٹی چھوٹی فتوحات دراصل ہمارے اندر کے خاموش انقلاب کی علامت ہیں۔
ایمان انسان کو ہر مشکل کے باوجود دوبارہ اٹھنے کا حوصلہ دیتا ہے۔ وہ اسے یاد دلاتا ہے کہ آزمائش ہمیشہ نہیں رہتی اور اللہ کی رحمت مایوسی سے کہیں وسیع ہے۔
یہ سفر مشکل ہے، مگر اسی میں کامیابی ہے۔ اس لیے اگر آج ہم خاموش ہیں، لڑ رہے ہیں اور خود کو سنوارنے کی کوشش کر رہے ہیں تو یہ کمزوری نہیں۔ یہ ہماری سب سے بڑی جنگ ہے، اور ممکن ہے یہی خاموش انقلاب ہماری زندگی بدل دے ہمیشہ کے لیے۔
Silent Revolution
