شگر ویمن ڈگری کالج میں رواں سال کلاسز شروع کرنے کا فیصلہ، والدین سے بچیوں کے داخلوں کی اپیل
رپورٹ . عابد شگری 5 سی این نیوز
شگر ویمن ڈگری کالج میں رواں سال کلاسز شروع کرنے کا فیصلہ، والدین سے بچیوں کے داخلوں کی اپیل, شگر میں طالبات کے لیے اعلیٰ تعلیم کے مواقع کو فروغ دینے کے لیے شگر ویمن ڈگری کالج میں رواں سال ہر صورت باقاعدہ کلاسز شروع کرنے کا فیصلہ کیا گیا ہے۔ کالج کو فعال بنانے کے لیے والدین اور کمیونٹی کو طالبات کے داخلوں کی جانب راغب کرنے، جبکہ مستحق طالبات کو فیسوں کی مد میں تعاون فراہم کرنے پر بھی اتفاق کیا گیا ہے۔ اس حوالے سے صدر شگر ٹاؤن منیجمنٹ سوسائٹی حاجی وزیر فداعلی کی زیر صدارت ایک اہم اجلاس منعقد ہوا، جس میں پرنسپل انٹر کالج شگر، سابق ڈائریکٹر المصطفیٰ ایجوکیشن سسٹم وزیر حامد حسین اور علاقے کے معززین نے شرکت کی۔
اجلاس میں شگر ویمن ڈگری کالج کی عمارت کی تکمیل کے بعد ادارے میں تعلیمی سرگرمیوں کے باقاعدہ آغاز، طالبات کے داخلوں، والدین کی حوصلہ افزائی اور کالج کو فعال بنانے کے لیے درکار اقدامات پر تفصیلی تبادلہ خیال کیا گیا۔شرکاء اجلاس نے اس بات پر اتفاق کیا کہ ویمن ڈگری کالج کو مزید تاخیر کے بغیر رواں سال ہی فعال کیا جائے گا اور کلاسز کا باقاعدہ اجراء یقینی بنایا جائے گا۔ اس مقصد کے لیے شگر بھر میں آگاہی مہم چلانے اور والدین کو اپنی بچیوں کے داخلے کے لیے آمادہ کرنے پر بھی زور دیا گیا۔ اجلاس میں اس بات پر بھی اتفاق کیا گیا کہ مالی مشکلات کے باعث کسی مستحق طالبہ کو تعلیم سے محروم نہیں ہونے دیا جائے گا۔ ایسے طالبات کو فیسوں کی مد میں کمیونٹی کی جانب سے ممکنہ تعاون فراہم کیا جائے گا، جبکہ کالج کے فعال ہونے کے عمل میں اہل علاقہ بھی بھرپور کردار ادا کریں گے۔شرکاء کا کہنا تھا کہ شگر میں ویمن ڈگری کالج کا قیام علاقے کی طالبات کے لیے اعلیٰ تعلیم کے حصول کی راہ میں ایک اہم پیش رفت ہے۔ کالج کے فعال ہونے سے نہ صرف طالبات کو اپنے علاقے میں اعلیٰ تعلیم کی سہولت میسر آئے گی بلکہ والدین کو بھی اپنی بچیوں کی تعلیم کے حوالے سے درپیش مشکلات میں کمی آئے گی۔اجلاس میں اس عزم کا اظہار کیا گیا کہ شگر ویمن ڈگری کالج میں کلاسز کے آغاز کو یقینی بنانے کے لیے کمیونٹی، تعلیمی اداروں اور متعلقہ حلقے مشترکہ کوششیں کریں گے، تاکہ علاقے کی زیادہ سے زیادہ طالبات اس تعلیمی سہولت سے مستفید ہوسکیں۔
روندو کے مڈل سکول بلامیک میں مطلوبہ تدریسی عملہ دستیاب نہ ہونے کے خلاف اہلِ علاقہ نے احتجاج
داراشفاء حضرت عباس ہسپتال سکردو. آمینہ یونس ،بلتستانی
عیب نہیں، پردہ پوشی انسانیت ہے. محمد عابد رشید
Shigar Women’s Degree College
