داراشفاء حضرت عباس ہسپتال سکردو. آمینہ یونس ،بلتستانی
داراشفاء ہسپتال سکردو، وحدت المسلمین کے زیرِ سایہ چلنے والا ایک ایسا طبی مرکز ہے جو بلتستان بھر کے غریب لوگوں کے لیے مفید طبی سہولیات فراہم کر رہا ہے۔ یہ ادارہ واقعی غریبوں کی خدمت میں مصروف ہے۔ کئی سال سے غریب و نادار لوگوں کا علاج معمولی فیس میں کیا جا رہا ہے اور کم اخراجات میں بڑے سے بڑے طبی مسائل کا حل فراہم کیا جاتا ہے۔ تقریباً دو سال پہلے یہاں کے ایڈمن جناب محمد علی صاحب آئے اور ان کی فیملی کے توسط سے کچھ ایسے ڈونرز ہسپتال سے منسلک ہوئے جنہوں نے نہ صرف ہسپتال کو سہارا دیا بلکہ بہت سے لوگوں کے رزق کا ذریعہ بھی اسی ادارے کو بنا دیا۔ ان کی معاونت سے ہسپتال کو جدید مشینری سے آراستہ کرنے کے ساتھ ساتھ عمارت اور دیگر سہولیات پر بھی خاصا کام کیا گیا، جس کے نتیجے میں یہ ایک معیاری ہسپتال کی صورت اختیار کر گیا ہے۔
یہاں مخلص ڈاکٹرز اور طبی عملے کی بھی کمی نہیں۔ لیبارٹری کا نظام بھی اچھا ہے، جہاں کم فیس میں کئی ٹیسٹ ہو جاتے ہیں، جبکہ ایسے غریب مریض جو فیس ادا کرنے کی استطاعت نہیں رکھتے، ان کے لیے رعایتی سہولت بھی موجود ہے۔ بہترین لیبر روم کا نظام ہے، جہاں گائناکالوجسٹ کی زیرِ نگرانی لیڈی ہیلتھ وزیٹرز ہر وقت مریضوں کی خدمت کے لیے موجود رہتی ہیں۔
بچوں کے لیے بھی ماہر ڈاکٹر موجود ہیں۔ ڈاکٹر سجیلہ بچوں کو ایک بہترین ماں اور دوست کی طرح ٹریٹ کرتی ہیں۔ ان کی مسکراہٹ، محبت اور نرم رویے سے بچے یوں گھل مل جاتے ہیں جیسے وہ انہیں برسوں سے جانتے ہوں۔ بچوں کو بہلانے کے لیے ان کی ٹیبل کے ساتھ ایک چھوٹی میز بھی رکھی گئی ہے جو کھلونوں سے بھری رہتی ہے۔ یہ ننھے مریضوں کے لیے ہسپتال کے ماحول کو خوشگوار بنانے کا ایک خوبصورت ذریعہ ہے۔
ڈاکٹروں کے ساتھ میڈیکل اسٹاف بھی نہایت مخلص اور نرم دل ہے۔ چاہے لیب اسسٹنٹ غلام علی ہوں، اسٹور مین احمد علی ہوں، پرچی دینے والے مظاہر ہوں یا صفائی کا کام کرنے والے افراد، سب کا رویہ مریضوں کے ساتھ ہمدردانہ اور خلوص بھرا ہے۔ مریض کو محسوس ہی نہیں ہوتا کہ وہ کسی اجنبی جگہ پر ہے؛ بلکہ ایسا لگتا ہے جیسے اپنے ہی گھر کے لوگوں کے درمیان بیٹھا ہو۔
دراشفا ہسپتال غریبوں کے لیے واقعی ماں کی طرح ہے، جہاں وہ اپنے دکھ اور تکلیف کھل کر بیان کر سکتے ہیں اور کم فیس میں علاج کی سہولت حاصل کرتے ہیں۔ مناسب قیمت پر ٹیسٹ کی سہولت بھی موجود ہے، اس لیے مریض کو ٹیسٹ کے لیے الگ الگ لیبارٹریوں کے چکر نہیں لگانے پڑتے اور نہ ہی کئی دن انتظار کرنا پڑتا ہے۔ یہ ہسپتال بلتستان کے لوگوں کے لیے ایک قیمتی سرمایہ ہے۔
اس ہسپتال سے وابستہ ڈونرز بھی اس ادارے سے گہری محبت رکھتے ہیں۔ دبئی میں مقیم میاں بیوی ہسپتال کے معاملات اور ضروریات کا خود جائزہ لیتے ہیں اور اپنی استطاعت کے مطابق سہولیات فراہم کرنے کی کوشش کرتے ہیں۔ ان کی توجہ اور تعاون سے ہسپتال میں جدید سہولیات پیدا ہوئی ہیں، جسے دیکھ کر واقعی خوشی ہوتی ہے۔
دراشفا ہسپتال صرف ایک عمارت یا علاج گاہ نہیں بلکہ بہت سے غریب خاندانوں کے لیے امید کا چراغ ہے۔ ضرورت اس بات کی ہے کہ بلتستان کے لوگ اس سہولت سے بھرپور استفادہ کریں اور جو لوگ اس ہسپتال کی خدمات سے واقف ہیں، وہ دوسروں تک بھی اس کی معلومات پہنچائیں۔ شاید ہماری ایک چھوٹی سی کوشش کسی ایسے مریض تک یہ پیغام پہنچا دے جو صرف مالی مشکلات کی وجہ سے علاج سے محروم ہے۔ کسی ضرورت مند کو بروقت علاج کی سہولت مل جائے اور ایک قیمتی جان بچ جائے، تو اس سے بڑھ کر خدمتِ انسانیت اور کیا ہو سکتی ہے؟

قلم کی طاقت. یاسمین اختر طوبیٰ ریسرچ اسکالر گوجرہ،پاکستان

ٹھنڈا چولھا، بکھرتے رشتے. یاسمین اختر طوبیٰ ریسرچ اسکالر گوجرہ، پاکستان

پاکستان ریلوے ان لائن ٹکٹ ریٹ، ریلوے کی تنظیمی ساخت

Dar-ul-Shifa Hazrat Abbas Hospital Skardu