شگر کی دو بیٹیوں کا بڑا اعزاز، کومل زہرا اور عاطفہ بتول پہلی AFNS آفیسرز بن گئیں, ضلع شگر کی دو ہونہار اور باصلاحیت بیٹیوں کومل زہرا دختر اعجاز حسین اور عاطفہ بتول دختر سکندر علی نے پاک فوج میں بطور AFNS آفیسر (BPS-17) کامیاب
شگر (نامہ نگار) شگر کی دو بیٹیوں کا بڑا اعزاز، کومل زہرا اور عاطفہ بتول پہلی AFNS آفیسرز بن گئیں, ضلع شگر کی دو ہونہار اور باصلاحیت بیٹیوں کومل زہرا دختر اعجاز حسین اور عاطفہ بتول دختر سکندر علی نے پاک فوج میں بطور AFNS آفیسر (BPS-17) کامیاب تربیت مکمل کرکے لیفٹیننٹ کے عہدے پر پاس آؤٹ ہونے کا اعزاز حاصل کرلیا۔ دونوں افسران کا تعلق ضلع شگر سے ہے اور ان کی کامیابی کو علاقے کے لیے ایک اہم اور قابلِ فخر سنگِ میل قرار دیا جا رہا ہے۔ کومل زہرا اور عاطفہ بتول نے نیشنل یونیورسٹی آف میڈیکل سائنسز (NUMS) سے BSN Generic میں گریجویشن مکمل کرنے کے بعد Armed Forces Nursing Service (AFNS) میں شمولیت اختیار کی۔ پاک فوج میں شمولیت کے بعد دونوں نے مقررہ پیشہ ورانہ و عسکری تربیت کامیابی سے مکمل کی اور پاسنگ آؤٹ کے موقع پر لیفٹیننٹ کے عہدے پر فائز ہوئیں۔ دونوں نوجوان افسران کو ضلع شگر کی پہلی AFNS آفیسرز ہونے کا اعزاز بھی حاصل ہوا ہے، جو نہ صرف ان کے خاندان بلکہ پورے ضلع شگر کے لیے باعثِ فخر ہے۔ ان کی کامیابی اس بات کا عملی ثبوت ہے کہ دور افتادہ اور پہاڑی علاقے سے تعلق رکھنے والی باصلاحیت طالبات بھی محنت، عزم اور لگن کے ذریعے قومی سطح پر نمایاں مقام حاصل کرسکتی ہیں۔ کومل زہرا اور عاطفہ بتول کی کامیابی پر ان کے اہل خانہ، رشتہ داروں، دوست احباب اور شگر کے مختلف مکاتبِ فکر سے تعلق رکھنے والے افراد نے خوشی کا اظہار کرتے ہوئے انہیں دلی مبارکباد پیش کی ہے۔ عوامی حلقوں نے امید ظاہر کی ہے کہ دونوں افسران اپنی صلاحیتوں کو بروئے کار لاتے ہوئے پاک فوج اور شعبہ صحت میں ملک و قوم کی خدمت کا سلسلہ جاری رکھیں گی۔ شگر کی ان دونوں بیٹیوں کی کامیابی علاقے کی دیگر طالبات کے لیے بھی حوصلہ افزا مثال ہے اور اس سے نوجوان نسل میں اعلیٰ تعلیم، پیشہ ورانہ مہارت اور قومی خدمت کے جذبے کو مزید فروغ ملنے کی توقع ہے۔

ضمیر زندہ ہو تو انسان اکیلا بھی حق کے ساتھ کھڑا رہتا ہے. شبیر حسین کمال

Proud Milestone for Shigar