منشیات سے پاک معاشرہ، ہماری مشترکہ ذمہ داری . ڈاکٹر محمد ارشد
منشیات ایک ایسی خطرناک لعنت ہے جو نہ صرف ایک فرد کی زندگی برباد کرتی ہے بلکہ پورے خاندان اور معاشرے کو اپنی لپیٹ میں لے لیتی ہے۔ نوجوان نسل کسی بھی ملک و قوم کا قیمتی سرمایہ ہوتی ہے، مگر افسوس کہ منشیات کے بڑھتے ہوئے رجحان کے باعث ہمارے نوجوانوں کا مستقبل خطرے میں پڑتا جا رہا ہے۔
ضرورت اس امر کی ہے کہ سکولوں، کالجوں، یونیورسٹیوں، دینی و تعلیمی اداروں اور دیہی علاقوں کے تمام چکوک میں منشیات کے نقصانات کے حوالے سے بھرپور آگاہی مہم چلائی جائے۔ والدین، اساتذہ، علماء کرام، صحافی برادری، سماجی کارکنان اور متعلقہ اداروں کو مل کر نوجوانوں کو منشیات کے تباہ کن اثرات سے آگاہ کرنا ہوگا۔
منشیات انسان کی صحت، تعلیم، روزگار، عزتِ نفس اور خاندانی زندگی کو شدید متاثر کرتی ہیں۔ ایک نوجوان اگر اس لعنت کا شکار ہو جائے تو اس کے ساتھ پورا خاندان ذہنی، معاشی اور معاشرتی مشکلات کا سامنا کرتا ہے۔ اس لیے ضروری ہے کہ نوجوانوں کو کھیلوں، مثبت سرگرمیوں، تعلیم، ہنر اور صحت مند معاشرتی سرگرمیوں کی طرف راغب کیا جائے۔
والدین بھی اپنے بچوں پر خصوصی توجہ دیں۔ ان کے دوستوں، معمولات اور رویوں میں آنے والی غیر معمولی تبدیلیوں کو نظر انداز نہ کیا جائے۔ اگر کسی نوجوان میں نشے کی علامات ظاہر ہوں تو اسے نفرت یا تضحیک کا نشانہ بنانے کے بجائے بروقت مدد، علاج اور رہنمائی فراہم کی جائے۔
ہم سب کو مل کر یہ عہد کرنا چاہیے کہ منشیات کو اپنے تعلیمی اداروں، محلوں، دیہات اور معاشرے سے دور رکھنے کے لیے اپنا بھرپور کردار ادا کریں گے۔ منشیات فروشوں کے خلاف قانون کے مطابق سخت کارروائی اور نوجوان نسل کے تحفظ کے لیے مؤثر اقدامات وقت کی اہم ضرورت ہیں۔
آئیں! اپنے بچوں کے روشن مستقبل کے لیے منشیات کے خلاف آواز بلند کریں اور ایک ایسا معاشرہ تشکیل دیں جہاں ہماری نوجوان نسل تعلیم، صحت، کردار اور کامیابی کے راستے پر آگے بڑھے۔
منشیات سے انکار، زندگی سے پیار یہی ہماری پہچان ہونی چاہیے۔

Drug-Free Society