بے مقصد اور بامقصد زندگی میں فرق . شبیر حسین کمال
زندگی اللہ تعالیٰ کی عطا کردہ ایک عظیم نعمت ہے۔ ہر انسان دنیا میں آتا ہے، کچھ وقت گزارتا ہے اور پھر اس دنیا سے رخصت ہو جاتا ہے، لیکن اصل سوال یہ ہے کہ ہم نے اپنی زندگی کس مقصد کے لیے گزاری؟ یہی سوال ایک بے مقصد اور بامقصد زندگی کے درمیان فرق پیدا کرتا ہے۔
بے مقصد زندگی ایسی زندگی ہے جس میں انسان کے پاس خواہشات تو بہت ہوتی ہیں، مگر کوئی واضح منزل نہیں ہوتی۔ کبھی وہ لوگوں کی دیکھا دیکھی چلتا ہے، کبھی دنیاوی آسائشوں کے پیچھے بھاگتا ہے اور کبھی اپنا قیمتی وقت فضول کاموں میں ضائع کر دیتا ہے۔ ایسی زندگی بظاہر مصروف ضرور ہوتی ہے، مگر اندر سے خالی محسوس ہوتی ہے۔اس کے برعکس بامقصد زندگی وہ ہے جس میں انسان اپنی منزل کو پہچانتا ہے۔ وہ جانتا ہے کہ مجھے صرف دنیا کے لیے نہیں بلکہ اپنے رب کی رضا اور آخرت کی کامیابی کے لیے بھی زندگی گزارنی ہے۔ وہ اپنے وقت کی قدر کرتا ہے، علم حاصل کرتا ہے، اپنے کردار کو بہتر بناتا ہے اور دوسروں کے لیے فائدہ مند بننے کی کوشش کرتا ہے۔
قرآن مجید ہمیں یاد دلاتا ہے
أَفَحَسِبْتُمْ أَنَّمَا خَلَقْنَاكُمْ عَبَثًا وَأَنَّكُمْ إِلَيْنَا لَا تُرْجَعُونَ
یعنی کیا تم نے یہ سمجھ رکھا تھا کہ ہم نے تمہیں بے مقصد پیدا کیا ہے اور تم ہماری طرف لوٹ کر نہیں آؤ گے؟
بامقصد انسان کے راستے میں مشکلات ضرور آتی ہیں، لیکن وہ مشکلات سے ٹوٹتا نہیں۔اسے معلوم ہوتا ہے کہ ہر امتحان اسے مضبوط بنانے کے لیے ہے۔ وہ ناکامی سے سبق لیتا ہے اور دوبارہ کوشش کرتا ہے، کیونکہ اس کی نظر صرف آج پر نہیں بلکہ اپنی منزل پر ہوتی ہے۔
ہمیں اپنے آپ سے یہ سوال ضرور کرنا چاہیے اگر آج ہماری زندگی ختم ہو جائے تو ہمارے پیچھے کیا باقی رہ جائے گا؟ دولت، شہرت اور عہدے ختم ہو جائیں گے، مگر ہمارا کردار، ہمارے اعمال اور لوگوں کے دلوں میں ہماری یاد باقی رہ سکتی ہے۔اس لیے زندگی کو صرف گزارنے کے بجائے بامقصد بنائیں۔ اپنے وقت کو قیمتی سمجھیں، اپنے رب سے تعلق مضبوط کریں، علم حاصل کریں دوسروں کے کام آئیں اور ایسا کردار اختیار کریں کہ ہماری زندگی ہمارے جانے کے بعد بھی کسی کے لیے روشنی بن سکے۔زندگی لمبی ہونا کامیابی نہیں، زندگی کا بامقصد ہونا کامیابی ہے۔

ہجرت کے بعد اردو سے میرا رشتہ: امریکا میں اردو ادب کی نئی جہات. سلیم خان ہیوسٹن (ٹیکساس) امریکا

ایک گفتگو جس نے میری سوچ بدل دی. بتول فاطمہ

کچھ تو غلط ہو رہا ہے ( لڑکیاں ) . طہٰ علی تابشٓ بلتستانی

Difference Between a Meaningless and a Purposeful Life