چھوربٹ سکسا میں جرمنی میں تعلیم و روزگار کے مواقع پر آگاہی سیمینار
چھوربٹ(نمائندہ خصوصی: شاہ حسین شُکور): Shyok Foundation Pakistan کے زیرِ اہتمام “Study and Work Life in Germany” کے عنوان سے گرلز ہائر سیکنڈری اسکول سکسہ میں آگاہی سیمینار منعقد ہوا، جس میں چھوربٹ بھر سے طلبہ و طالبات، اساتذہ، والدین اور مختلف شعبہ ہائے زندگی سے تعلق رکھنے والے افراد نے شرکت کی۔

سیمینار میں اسسٹنٹ کمشنر چھوربٹ محترمہ صوفیہ نور اور جرمنی میں مقیم مائننگ انجینئر محمد اعظم نے بطور گیسٹ اسپیکر شرکت کی۔ مقررین نے جرمنی میں اعلیٰ تعلیم، ریسرچ، داخلوں، اسکالرشپس، آوسبلڈونگ (پیشہ ورانہ تربیت)، تعلیمی اخراجات اور روزگار کے مواقع کے حوالے سے شرکاء کو تفصیلی معلومات اور رہنمائی فراہم کی۔

اس موقع پر اسسٹنٹ کمشنر صوفیہ نور نے کہا کہ دورافتادہ علاقوں کے نوجوانوں کو ملکی و بین الاقوامی تعلیمی اور پیشہ ورانہ مواقع سے آگاہ کرنا وقت کی اہم ضرورت ہے۔ انہوں نے طلبہ و طالبات پر زور دیا کہ تعلیم کے ساتھ جدید علوم، زبانوں اور پیشہ ورانہ مہارتوں پر توجہ دے کر مستقبل کے لیے واضح اہداف مقرر کریں۔ انہوں نے Shyok Foundation Pakistan کی اس کاوش کو سراہا۔

محمد اعظم نے جرمنی کے تعلیمی نظام، اعلیٰ تعلیم، تحقیقی مواقع، آوسبلڈونگ اور ورک لائف کے مختلف پہلوؤں پر روشنی ڈالی اور طلبہ کو داخلوں و مستقبل کی منصوبہ بندی کے حوالے سے رہنمائی فراہم کی۔ طلبہ و طالبات نے مختلف سوالات کیے جن کے مقررین نے تفصیلی جوابات دیے۔

سیمینار میں DDEO حسن آباد، پرتوک و فرانو سمیت مختلف سرکاری و نجی تعلیمی اداروں کے اساتذہ، والدین اور طلبہ و طالبات نے شرکت کی۔ اس موقع پر طالبات کی جانب سے مختلف Entrepreneurship Stalls بھی لگائے گئے، جہاں انہوں نے اپنی تخلیقی صلاحیتوں اور کاروباری آئیڈیاز پیش کیے۔

واضح رہے کہ Shyok Foundation Pakistan کی بنیاد 2018 میں جرمنی میں رکھی گئی، جو چھوربٹ کے نوجوانوں کو معیاری تعلیم، جدید ہنر اور بین الاقوامی تعلیمی و پیشہ ورانہ مواقع کے حوالے سے رہنمائی اور معاونت فراہم کر رہی ہے۔ شرکاء نے سیمینار کو مفید قرار دیتے ہوئے فاؤنڈیشن کی کاوش کو سراہا اور مستقبل میں ایسے پروگرامز کے تسلسل کی ضرورت پر زور دیا۔

شاہ حسین شُکور — نمائندہ خصوصی

Awareness Seminar on Education and Employment