گلگت ڈائریکٹر جنرل گلگت بلتستان ڈیزاسٹر مینجمنٹ اتھارٹی (جی بی ڈی ایم اے) ذاکر حسین نے متوقع سیلابی سیزن کے پیش نظر سنٹرل ویئر ہاؤس کا دورہ
رپورٹ، 5 سی این نیوز
گلگت ڈائریکٹر جنرل گلگت بلتستان ڈیزاسٹر مینجمنٹ اتھارٹی (جی بی ڈی ایم اے) ذاکر حسین نے متوقع سیلابی سیزن کے پیش نظر سنٹرل ویئر ہاؤس کا دورہ کیا، جہاں انہوں نے امدادی سامان کے ذخیرے، معیار اور دستیابی کا تفصیلی جائزہ لیا۔دورے کے دوران متعلقہ افسران نے ڈی جی کو بریفنگ دیتے ہوئے بتایا کہ ویئر ہاؤس میں ہنگامی حالات سے نمٹنے کے لیے خیمے، کمبل، خشک راشن اور دیگر ضروری اشیاء وافر مقدار میں موجود ہیں۔ اس موقع پر ذاکر حسین نے ہدایت کی کہ ممکنہ سیلابی صورتحال کے پیش نظر تمام تر انتظامات کو قبل از وقت مکمل کیا جائے اور کسی بھی ہنگامی صورتحال میں فوری رسپانس کے لیے ادارہ جاتی رابطوں کو مزید مؤثر بنایا جائے۔انہوں نے کہا کہ موسمیاتی تبدیلیوں کے باعث قدرتی آفات کے خطرات میں اضافہ ہو رہا ہے، اس لیے پیشگی تیاری، بروقت حکمت عملی اور مربوط اقدامات ناگزیر ہیں تاکہ انسانی جانوں اور املاک کو نقصان سے بچایا جا سکے۔ڈائریکٹر جنرل جی بی ڈی ایم اے نے اس عزم کا اظہار کیا کہ ادارہ کسی بھی ہنگامی صورتحال سے نمٹنے کے لیے ہمہ وقت تیار ہے اور متاثرہ عوام کو فوری اور مؤثر ریلیف فراہم کرنا اولین ترجیح ہے۔
urdu news update Gilgit-Baltistan Disaster Management Authority
