شگرضلع شگر میں حال ہی میں تبادلہ ہونے والے ڈپٹی کمشنر عارف حسین کے اعزاز میں محکمہ مال اور ضلعی سٹاف کی جانب سے ایک پروقار الوداعی تقریب
رپورٹ، 5 سی این نیوز
شگرضلع شگر میں حال ہی میں تبادلہ ہونے والے ڈپٹی کمشنر عارف حسین کے اعزاز میں محکمہ مال اور ضلعی سٹاف کی جانب سے ایک پروقار الوداعی تقریب کا انعقاد کیا گیا، جس میں ضلعی انتظامیہ، مختلف محکموں کے افسران اور سٹاف کی بڑی تعداد نے شرکت کی۔ تقریب میں اسسٹنٹ کمشنر شگر فیصل حیات گوندل، سابق ممبر ضلع کونسل حاجی وزیر فداعلی، ایگزیکٹو انجینئر مواصلات و تعمیرات زکاوت علی، مولانا عبد القیوم شورش سمیت تمام لائن ڈیپارٹمنٹس کے سربراہان، تینوں تحصیلوں کے تحصیلدار، فیلڈ اور آفس سٹاف شریک ہوئے۔ تقریب کے دوران مقررین نے عارف حسین کی بطور ڈپٹی کمشنر شگر شاندار کارکردگی، مثالی قیادت اور عوام دوست اقدامات کو زبردست الفاظ میں خراج تحسین پیش کیا۔ مقررین کا کہنا تھا کہ عارف حسین نے اپنی تعیناتی کے دوران دن رات محنت کرتے ہوئے نہ صرف انتظامی امور کو بہتر انداز میں چلایا بلکہ ضلع کی مجموعی ترقی، عوامی مسائل کے حل اور ادارہ جاتی ہم آہنگی کے فروغ میں بھی نمایاں کردار ادا کیا۔ انہوں نے کہا کہ خصوصاً سیلابی صورتحال اور حالیہ حساس واقعات کے دوران عارف حسین نے جس پیشہ ورانہ مہارت، بردباری اور بروقت فیصلوں کے ذریعے امن و امان کو برقرار رکھا اور عوام کے جان و مال کا تحفظ یقینی بنایا، وہ قابلِ تقلید ہے۔ ان کی قیادت میں ضلعی انتظامیہ نے مؤثر حکمت عملی کے ذریعے چیلنجز کا مقابلہ کیا اور حالات کو قابو میں رکھا۔ مقررین نے مزید کہا کہ عارف حسین ایک دیانتدار، متحرک اور عوام دوست آفیسر کے طور پر ہمیشہ یاد رکھے جائیں گے۔ ان کی خدمات ضلع شگر کی ترقی اور استحکام میں ایک سنگِ میل کی حیثیت رکھتی ہیں۔ تقریب کے اختتام پر شرکاء نے عارف حسین کے لیے نیک خواہشات کا اظہار کرتے ہوئے ان کے روشن مستقبل کے لیے دعا کی۔
urdu news update Farewell Ceremony
