شگر معرکۂ حق اور آپریشن بنیان المرصوص کی کامیابی کے ایک سال مکمل ہونے پر مسلم لیگ (ن) شگر کے زیرِ اہتمام ایک عظیم الشان ریلی کا انعقاد کیا گیا
شگر معرکۂ حق اور آپریشن بنیان المرصوص کی کامیابی کے ایک سال مکمل ہونے پر مسلم لیگ (ن) شگر کے زیرِ اہتمام ایک عظیم الشان ریلی کا انعقاد کیا گیا۔ ریلی کی قیادت مسلم لیگ (ن) شگر کے سرپرستِ اعلیٰ حاجی فدا علی اور متوقع امیدوار طاہر شگری نے کی۔ ریلی کا آغاز حسینی چوک سے ہوا جس میں ہزاروں کی تعداد میں عوام نے شرکت کی۔ شرکاء نے پاکستان اور پاک فوج کے حق میں فلک شگاف نعرے بلند کیے اور قومی یکجہتی کا بھرپور مظاہرہ کیا۔ ریلی مختلف شاہراہوں سے گزرتی ہوئی یادگارِ شہداء شگر پہنچی، جہاں یہ ایک بڑے جلسے کی شکل اختیار کر گئی۔ جلسے سے خطاب کرتے ہوئے حاجی فدا علی نے پاک فوج کو زبردست خراجِ تحسین پیش کرتے ہوئے اسے دنیا کی بہترین افواج میں سے ایک قرار دیا۔ انہوں نے کہا کہ پاک فوج نے ہمیشہ ملک کی سلامتی، استحکام اور دفاع کے لیے لازوال قربانیاں دی ہیں، جنہیں قوم کبھی فراموش نہیں کر سکتی۔ انہوں نے عوام پر زور دیا کہ وہ ہر مشکل گھڑی میں اپنی افواج کے شانہ بشانہ کھڑے رہیں۔اس موقع پر خطاب کرتے ہوئے طاہر شگری نے کہا کہ آپریشن بنیان المرصوص کی کامیابی قوم کے اتحاد، عزم اور پاک فوج کی پیشہ ورانہ صلاحیتوں کا واضح ثبوت ہے۔ انہوں نے کہا کہ ملکی دفاع اور سلامتی کے لیے پوری قوم اپنی افواج کے ساتھ سیسہ پلائی ہوئی دیوار کی مانند کھڑی ہے۔ مقررین نے شہداء کی عظیم قربانیوں کو خراجِ عقیدت پیش کرتے ہوئے کہا کہ انہی قربانیوں کی بدولت آج ملک امن اور استحکام کی راہ پر گامزن ہے۔ جلسے کے اختتام پر ملکی سلامتی، ترقی اور شہداء کے درجات کی بلندی کے لیے خصوصی دعا بھی کی گئی۔
urdu news update A grand rally
