شگر پولیس نے کنسٹیبل محمد اسلم قتل کیس کی تفتیش میں ایک اور اہم کامیابی حاصل کرتے ہوئے مزید دو مطلوب ملزمان کو گرفتار, تفیش میں اہم انکشافات
شگر پولیس نے کنسٹیبل محمد اسلم قتل کیس کی تفتیش میں ایک اور اہم کامیابی حاصل کرتے ہوئے مزید دو مطلوب ملزمان کو گرفتار کر لیا۔ پولیس کے مطابق گرفتار ہونے والے ملزمان نجف علی اور اعظم خان سکنہ شگر ہیں، جنہیں ڈی ایس پی محمد زمان شگری کی سربراہی میں قائم خصوصی تفتیشی ٹیم (SIT) نے جدید تفتیشی حکمت عملی اور مؤثر کارروائی کے ذریعے گرفتار کیا۔ پولیس ترجمان کے مطابق کنسٹیبل محمد اسلم قتل کیس میں اس سے قبل مرکزی ملزمان ذوالفقار علی، ریاض علی، افتخار علی، نیاز علی اور عرفان کو بھی گرفتار کیا جا چکا ہے۔ مقدمہ نمبر 14/2026 بجرائم 302، 337-A، 337-F، 352، 147 اور 149 تعزیرات پاکستان کے تحت درج ہے۔ تحقیقات کے مطابق ملزمان نے مبینہ طور پر کنسٹیبل محمد اسلم پر سریوں، ڈنڈوں اور لوہے کے پائپوں سے تشدد کیا تھا، جس کے نتیجے میں وہ شدید زخمی ہوئے اور بعد ازاں زخموں کی تاب نہ لاتے ہوئے جاں بحق ہوگئے۔ وقوعے کے بعد ملزمان فرار ہو کر روپوش ہوگئے تھے۔ ڈی پی او شگر وزیر نیک عالم کی ہدایت پر قائم خصوصی تفتیشی ٹیم نے جدید تفتیشی ذرائع، تکنیکی شواہد اور خفیہ معلومات کی مدد سے ملزمان کا سراغ لگا کر انہیں گرفتار کیا۔ پولیس کے مطابق گرفتار ملزمان سے مزید تفتیش جاری ہے جبکہ کیس کے دیگر پہلوؤں کا بھی باریک بینی سے جائزہ لیا جا رہا ہے۔ ترجمان گلگت بلتستان پولیس نے کہا ہے کہ کنسٹیبل محمد اسلم کے ورثاء کو انصاف کی فراہمی ہر صورت یقینی بنائی جائے گی اور جرم میں ملوث تمام عناصر کو قانون کے کٹہرے میں لایا جائے گا۔ پولیس کا کہنا ہے کہ کیس کی تفتیش میرٹ پر جاری ہے اور مزید پیش رفت بھی متوقع ہے۔