شگر ڈپٹی کمشنر شگر شیر افضل کی زیر صدارت سربراہانِ محکمہ جات کا ایک اہم اجلاس منعقد ہوا جس میں محرم الحرام 2026 کے دوران امن و امان، سیکیورٹی انتظامات کا جائزہ
رپورٹ، عابد شگری 5 سی نیوز
شگر ڈپٹی کمشنر شگر شیر افضل کی زیر صدارت سربراہانِ محکمہ جات کا ایک اہم اجلاس منعقد ہوا جس میں محرم الحرام 2026 کے دوران امن و امان، سیکیورٹی اور عوامی سہولیات سے متعلق انتظامات کا تفصیلی جائزہ لیا گیا۔اجلاس میں مختلف محکموں کے افسران نے محرم الحرام کے دوران اپنی تیاریوں اور انتظامی اقدامات پر بریفنگ دی۔ اس موقع پر مجالس اور جلوسوں کی سیکیورٹی، ٹریفک مینجمنٹ، صفائی ستھرائی، صحت کی سہولیات، بجلی اور پانی کی فراہمی سمیت دیگر امور پر غور کیا گیا۔ ڈپٹی کمشنر شیر افضل نے تمام متعلقہ اداروں کو ہدایت کی کہ محرم الحرام کے دوران عوام کو بہترین سہولیات کی فراہمی یقینی بنائی جائے اور مجالس و جلوسوں کے پرامن انعقاد کے لیے مربوط حکمت عملی اپنائی جائے۔ انہوں نے کہا کہ تمام ادارے باہمی رابطے اور تعاون کو مزید مؤثر بنائیں تاکہ کسی بھی ہنگامی صورتحال سے بروقت نمٹا جا سکے۔ انہوں نے متعلقہ محکموں کو ہدایت کی کہ مجالس اور جلوسوں کے راستوں پر صفائی، روشنی اور دیگر بنیادی سہولیات کی فراہمی کو ہر صورت یقینی بنایا جائے جبکہ ٹریفک کی روانی برقرار رکھنے کے لیے جامع انتظامات کیے جائیں۔ اجلاس کے اختتام پر محرم الحرام کے دوران امن، بھائی چارے اور مذہبی ہم آہنگی کے فروغ کے عزم کا اعادہ کیا گیا اور اس بات پر زور دیا گیا کہ تمام ادارے اپنی ذمہ داریاں پوری مستعدی اور ذمہ داری کے ساتھ انجام دیں۔
urdu news Security Arrangements for Muharram 2026