شگر میں محرم الحرام کے دوران دفعہ 144 نافذ، متعدد سرگرمیوں پر پابندی عائد
شگر میں محرم الحرام کے دوران دفعہ 144 نافذ، متعدد سرگرمیوں پر پابندی ، ڈسٹرکٹ مجسٹریٹ/ڈپٹی کمشنر شگر شیر افضل نے محرم الحرام کے دوران امن و امان کی صورتحال کو برقرار رکھنے اور عوام کے جان و مال کے تحفظ کو یقینی بنانے کے لیے ضلع بھر میں دفعہ 144 ضابطہ فوجداری 1898 نافذ کر دی ہے۔ جاری کردہ حکم نامے کے مطابق اسلحہ کی نمائش، ہوائی فائرنگ، موٹر سائیکل پر ڈبل سواری (پیلین رائیڈنگ)، ون ویلنگ، تیز رفتاری، مشکوک افراد کی نقل و حرکت، لاوڈ اسپیکر کے غیر قانونی استعمال، نفرت انگیز مواد کی تشہیر اور امن عامہ میں خلل ڈالنے والی دیگر سرگرمیوں پر پابندی عائد کر دی گئی ہے۔ حکم نامے میں کہا گیا ہے کہ محرم الحرام کے دوران مذہبی اجتماعات، مجالس اور جلوسوں میں بڑی تعداد میں عوام کی شرکت متوقع ہے، لہٰذا امن و امان برقرار رکھنے اور کسی بھی ناخوشگوار واقعے سے بچنے کے لیے احتیاطی اقدامات ناگزیر ہیں۔ڈپٹی کمشنر شگر شیر افضل نے کہا کہ ضلع شگر امن و اخوت کے حوالے سے ایک مثالی ضلع ہے اور محرم الحرام کے دوران بھی اس روایت کو برقرار رکھنے کے لیے ضلعی انتظامیہ، پولیس اور دیگر قانون نافذ کرنے والے ادارے مکمل طور پر متحرک ہیں۔ انہوں نے عوام سے اپیل کی کہ وہ جاری کردہ احکامات کی پابندی کریں اور انتظامیہ کے ساتھ بھرپور تعاون کریں۔ حکم نامے کے مطابق خلاف ورزی کے مرتکب افراد کے خلاف ضابطہ فوجداری اور دیگر متعلقہ قوانین کے تحت قانونی کارروائی عمل میں لائی جائے گی۔ یہ احکامات فوری طور پر نافذ العمل ہوں گے اور محرم الحرام کے دوران مؤثر رہیں گے۔
urdu news Multiple Activities Banned
