شگر میں کوئی بچہ تعلیم سے محروم نہ رہے، قدرتی وسائل پر پہلا حق مقامی عوام کا ہے، علامہ ڈاکٹر فرمان علی سعیدی شگری کا مجمع طلاب شگر کے زیرِ اہتمام منعقدہ مجلس سے خطاب
شگر مجمع طلاب شگر کے زیرِ اہتمام منعقدہ مجلس سے خطاب کرتے ہوئے علامہ ڈاکٹر فرمان علی سعیدی شگری نے کہا ہے کہ منبرِ رسولؐ سے وابستہ وعاظ، خطباء اور اہلِ منبر کی ذمہ داری ہے کہ وہ اپنے خطابات کے ذریعے معاشرے میں فکری، نظریاتی اور عملی اصلاح پیدا کریں، ظالم کے ظلم کو بے نقاب کریں، مظلوم کی حمایت کریں، محبتِ اہلِ بیتؑ کو فروغ دیں اور اسلامی تعلیمات کی روشنی میں عوام کے ایمان و عقائد کو مضبوط بنائیں۔ انہوں نے کہا کہ شگر کے عوام نے حالیہ انتخابات انتہائی پرامن، باشعور اور منظم انداز میں منعقد کیے، جو قابلِ ستائش ہیں۔ ان کے بقول اب انتخابی رقابت کا مرحلہ ختم ہو چکا ہے اور باہمی تعاون و یکجہتی کے ساتھ علاقے کی ترقی کے لیے کام کرنے کا وقت ہے۔ علامہ ڈاکٹر فرمان علی سعیدی شگری نے گلگت بلتستان اسمبلی کے اسپیکر منتخب ہونے پر شگر کے منتخب نمائندے عمران ندیم کو مبارکباد دیتے ہوئے کہا کہ یہ پورے ضلع شگر کے لیے باعثِ فخر ہے۔ انہوں نے کہا کہ منتخب نمائندہ بلا تفریق تمام عوام کی خدمت، ترقیاتی منصوبوں کے فروغ اور عوامی فلاح و بہبود کے لیے شب و روز کوشش کرے۔ انہوں نے تعلیم کو ترقی کی بنیاد قرار دیتے ہوئے مطالبہ کیا کہ شگر میں کوئی بھی بچہ تعلیم سے محروم نہ رہے اور علاقے میں ٹیکنیکل کالج کے قیام پر خصوصی توجہ دی جائے تاکہ نوجوان فنی تعلیم حاصل کرکے قدرتی وسائل سے بہتر استفادہ کر سکیں اور مقامی ترقی میں مؤثر کردار ادا کریں۔ قدرتی وسائل اور معدنیات کے حوالے سے گفتگو کرتے ہوئے انہوں نے کہا کہ گلگت بلتستان کے قدرتی وسائل پر سب سے پہلا حق مقامی عوام کا ہے۔ انہوں نے مطالبہ کیا کہ معدنیات کی لیز دیتے وقت قانون کے مطابق مقامی آبادی کو ترجیح دی جائے اور عوام کی رضامندی کے بغیر کسی بھی معدنی ذخیرے یا پہاڑ کو لیز پر نہ دیا جائے۔انہوں نے کہا کہ عوامی حقوق پر کسی قسم کا سمجھوتہ قبول نہیں کیا جائے گا۔ ان کا کہنا تھا کہ بعض غیر مقامی عناصر اور کمپنیاں شگر کے معدنی وسائل سے فائدہ اٹھا رہی ہیں، جبکہ مقامی عوام اپنے جائز حقوق سے محروم ہیں۔ انہوں نے حکومت سے مطالبہ کیا کہ قدرتی وسائل کے استعمال میں مقامی آبادی کے حقوق، مفادات اور ترجیحات کو ہر صورت یقینی بنایا جائے۔

urdu news local-rights-technical-college-natural-resources