شگر حسن شگری ایڈووکیٹ کی گرفتاری کے خلاف احتجاجی ریلی، مختلف سیاسی جماعتوں کی شرکت، فوری رہائی کا مطالبہ
رپورٹ، 5 سی این نیوز
شگر حسن شگری ایڈووکیٹ کی گرفتاری کے خلاف احتجاجی ریلی، مختلف سیاسی جماعتوں کی شرکت، فوری رہائی کا مطالبہ، پاکستان تحریک انصاف (پی ٹی آئی) شگر کے صدر حسن شگری ایڈووکیٹ کی گرفتاری کے خلاف شگر میں پی ٹی آئی کارکنوں کی جانب سے احتجاجی مظاہرہ اور ریلی نکالی گئی، جس میں پاکستان پیپلز پارٹی، پاکستان مسلم لیگ (ن) اور مجلس وحدت المسلمین کے رہنماؤں اور کارکنوں نے بھی شرکت کی۔ احتجاجی ریلی میں شریک سیاسی جماعتوں کے رہنماؤں اور کارکنوں نے حسن شگری ایڈووکیٹ کی گرفتاری کو بلاجواز قرار دیتے ہوئے شدید مذمت کی اور ان کی فوری رہائی کا مطالبہ کیا۔ مظاہرین نے سیاسی گرفتاریوں کے خلاف نعرے بازی کرتے ہوئے کہا کہ سیاسی کارکنوں کو اختلافِ رائے کی بنیاد پر گرفتار کرنا جمہوری اصولوں کے منافی ہے۔احتجاجی مظاہرے سے پی ٹی آئی شگر کے جنرل سیکریٹری وزیر نسیم، پاکستان پیپلز پارٹی کے خادم دلشاد، مسلم لیگ (ن) شگر کے سٹی صدر وزیر سکندر، مجلس وحدت المسلمین کے آخوند ظہیر عباس، شیخ محمد علی اور دیگر رہنماؤں نے خطاب کیا۔ مقررین نے کہا کہ حسن شگری ایڈووکیٹ کو رات کی تاریکی میں ان کے گھر سے گرفتار کرنا اور چادر و چار دیواری کے تقدس کو پامال کرنا قابلِ مذمت ہے۔ ان کا کہنا تھا کہ اگر کسی شہری کے خلاف کوئی قانونی مقدمہ یا الزام ہے تو اسے قانون کے مطابق کارروائی کا سامنا کرنا چاہیے، تاہم سیاسی بنیادوں پر گرفتاری اور سیاسی اسیری کسی صورت قابلِ قبول نہیں۔مقررین نے کہا کہ شگر ایک پُرامن علاقہ ہے اور یہاں سیاسی اختلافات کو ہمیشہ جمہوری اور پرامن طریقے سے حل کیا جاتا رہا ہے۔ انتظامیہ ایسے اقدامات سے گریز کرے جن سے علاقے کے پُرامن ماحول پر اثر پڑے۔ انہوں نے انتظامیہ کو متنبہ کیا کہ شگر جیسے پُرامن علاقے میں اس نوعیت کی کارروائی کے نتیجے میں اگر حالات کشیدہ ہوئے تو اس کی تمام تر ذمہ داری انتظامیہ پر عائد ہوگی۔ مقررین نے مطالبہ کیا کہ حسن شگری ایڈووکیٹ کو فوری طور پر رہا کیا جائے اور ان کی گرفتاری کی وجوہات اور قانونی حیثیت واضح کی جائے۔ مقررین نے اعلان کیا کہ حسن شگری کی رہائی تک احتجاجی جدوجہد جاری رکھی جائے گی اور مطالبہ تسلیم نہ ہونے کی صورت میں احتجاج کا دائرہ مزید وسیع کیا جائے گا۔ اس موقع پر مختلف سیاسی جماعتوں کے رہنماؤں کی مشترکہ شرکت کو حسن شگری کی گرفتاری کے خلاف وسیع تر سیاسی ردعمل کا اظہار قرار دیا گیا۔

انسان کون سی عزت کا طلب گار ہوتا ہے؟ شبیر کمال

Protest Rally in Shigar