شگر ، یونین کونسل الچوڑی میں گزشتہ ایک ماہ سے جاری بجلی کی بندش پر شدید تشویش، حکومت اور متعلقہ محکمہ سے فوری نوٹس لینے کا مطالبہ . شگر ڈسٹرکٹ کونسل الچوڑی کے امیدوار عمران حسین شگری
شگر ڈسٹرکٹ کونسل الچوڑی کے امیدوار عمران حسین شگری نے یونین کونسل الچوڑی میں گزشتہ ایک ماہ سے جاری بجلی کی بندش پر شدید تشویش کا اظہار کرتے ہوئے حکومت اور متعلقہ محکمہ سے فوری نوٹس لینے کا مطالبہ کیا ہے۔ اپنے بیان میں عمران حسین شگری نے کہا کہ الچوڑی کے عوام گزشتہ ایک ماہ سے بجلی جیسی بنیادی سہولت سے محروم ہیں، جس کے باعث معمولاتِ زندگی بری طرح متاثر ہو رہے ہیں۔ طویل عرصے سے جاری بجلی کی بندش پر عوام میں شدید اضطراب اور بے چینی پائی جا رہی ہے اور صبر کا پیمانہ لبریز ہو چکا ہے۔
انہوں نے کہا کہ حکومت اور متعلقہ ادارے عوامی مشکلات کا فوری ازالہ کرتے ہوئے الچوڑی کو فی الفور بجلی کی فراہمی بحال کریں۔ عوام کو مزید اندھیرے میں رکھنا ناقابلِ قبول ہے۔ عمران حسین شگری نے خبردار کیا کہ اگر بجلی کا مسئلہ فوری طور پر حل نہ کیا گیا تو الچوڑی کے عوام اپنے بنیادی حق کے حصول کے لیے پرامن احتجاج اور سڑکوں پر آنے پر مجبور ہوں گے، جبکہ احتجاج کے دوران کے ٹو روڈ کی بندش سمیت دیگر آئینی و قانونی راستے بھی اختیار کیے جا سکتے ہیں۔
انہوں نے حکومت سے مطالبہ کیا کہ صورتحال کی سنگینی کا فوری ادراک کرتے ہوئے بجلی کی بحالی کے لیے عملی اقدامات کیے جائیں، تاکہ عوام کی مشکلات کا خاتمہ ہو سکے۔

Power Outage