شگر میں یومِ دفاعِ پاکستان قومی جوش و جذبے سے منایا گیا.
رپورٹ، عابد شگری 5 سی این نیوز
ضلع شگر میں بھی یومِ دفاعِ پاکستان قومی جوش و جذبے، ملی عقیدت اور احترام کے ساتھ منایا گیا۔ اس سلسلے میں ضلعی انتظامیہ شگر کے زیرِ اہتمام یادگارِ شہداء شگر پر خصوصی تقریب کا انعقاد کیا گیا، جس میں پاک فوج کے افسران، ضلعی انتظامیہ اور دیگر متعلقہ حکام نے شرکت کی۔ تقریب میں ڈپٹی کمشنر شگر شیر افضل، لیفٹیننٹ کرنل عزیز احمد کمانڈر 69 میڈیم آرٹلری اور دیگر حکام شریک ہوئے۔ اس موقع پر ڈپٹی کمشنر شگر شیر افضل اور لیفٹیننٹ کرنل عزیز احمد نے یادگارِ شہداء پر حاضری دی، پھولوں کی چادر چڑھائی اور شہداء کو سلامی پیش کی۔ شرکاء نے وطن عزیز کے دفاع کے لیے اپنی جانوں کا نذرانہ پیش کرنے والے شہداء کو خراجِ عقیدت پیش کیا۔ تقریب سے خطاب کرتے ہوئے لیفٹیننٹ کرنل عزیز احمد، کمانڈر 69 میڈیم آرٹلری نے کہا کہ 6 ستمبر ہماری قومی تاریخ کا ایک اہم اور ناقابلِ فراموش باب ہے۔ یہ دن ہمیں پاک فوج کے بہادر جوانوں اور افسران کی لازوال قربانیوں کی یاد دلاتا ہے، جنہوں نے وطن عزیز کے دفاع کے لیے اپنی جانوں کا نذرانہ پیش کیا۔ انہوں نے کہا کہ یومِ دفاع ہمیں اس عزم کی تجدید کا موقع فراہم کرتا ہے کہ ملک کی سلامتی، خودمختاری اور استحکام کے لیے کسی بھی قربانی سے دریغ نہیں کیا جائے گا۔ پاک فوج اور قوم نے ہمیشہ متحد ہو کر ملک کا دفاع کیا ہے اور آئندہ بھی ہر چیلنج کا بھرپور مقابلہ کیا جائے گا۔لیفٹیننٹ کرنل عزیز احمد نے کہا کہ شہداء کی قربانیاں ہمارے لیے مشعلِ راہ ہیں، ہمیں ان کے جذبۂ حب الوطنی سے سبق حاصل کرتے ہوئے قومی یکجہتی، امن اور ملکی ترقی کے لیے اپنا کردار ادا کرنا چاہیے۔ اس موقع پر گفتگو کرتے ہوئے ڈپٹی کمشنر شگر شیر افضل نے کہا کہ یومِ دفاعِ پاکستان 1965ء کے ان عظیم سپوتوں کی قربانیوں کی یاد دلاتا ہے جنہوں نے وطن کے دفاع کے لیے اپنی جانوں کا نذرانہ پیش کیا۔ شہداء کی قربانیاں پوری قوم کے لیے مشعلِ راہ ہیں اور قوم اپنے بہادر شہداء اور غازیوں کو سلام پیش کرتی ہے۔ انہوں نے کہا کہ پاکستان کی سلامتی اور خودمختاری کے تحفظ کے لیے پاک فوج اور قوم کی قربانیاں ناقابلِ فراموش ہیں۔ ہمیں شہداء کی قربانیوں سے سبق حاصل کرتے ہوئے ملک کی تعمیر و ترقی، امن و استحکام اور قومی یکجہتی کے لیے اپنا بھرپور کردار ادا کرنا چاہیے۔ تقریب کے اختتام پر شہداء کے اہلِ خانہ سے ملاقات کی گئی، ان کے مسائل سنے گئے اور شہداء کے ایصالِ ثواب کے لیے فاتحہ خوانی کی گئی۔ اس موقع پر ملک و قوم کی سلامتی، استحکام، خوشحالی اور ترقی کے لیے خصوصی دعا بھی کی گئی۔

Pakistan Defence Day Celebrated