ہماری زندگی، ہمارا مقصد اور ہماری بھٹکتی ترجیحات. محمد عابد رشید
زندگی اللہ تعالیٰ کی طرف سے عطا کیا گیا ایک قیمتی تحفہ ہے۔ ہم خالی ہاتھ دنیا میں آتے ہیں اور خالی ہاتھ ہی واپس چلے جاتے ہیں، مگر ان دونوں منزلوں کے درمیان جو وقت ہمیں ملتا ہے، وہی ہماری اصل پہچان بن جاتا ہے۔ کبھی ہم نے سوچا ہے کہ ہماری زندگی کا مقصد کیا ہے؟ ہم کہاں جانا چاہتے تھے اور آج کہاں کھڑے ہیں؟ ہر انسان اپنی زندگی میں کوئی نہ کوئی خواب اور مقصد لے کر چلتا ہے۔ کوئی اپنے خاندان کا مستقبل سنوارنا چاہتا ہے، کوئی علم حاصل کرکے معاشرے کی خدمت کرنا چاہتا ہے، کوئی دوسروں کے لیے آسانیاں پیدا کرنا چاہتا ہے۔ مگر وقت گزرنے کے ساتھ ہم اکثر اپنے اصل مقصد سے دور ہونے لگتے ہیں۔ دنیا کی چمک دمک، دولت، شہرت، دوسروں سے مقابلہ، لوگوں کی رائے اور سوشل میڈیا کی مصنوعی دنیا ہمیں اپنی طرف کھینچ لیتی ہے۔ ہم اپنی زندگی جینے کے بجائے یہ سوچنے لگتے ہیں کہ لوگ ہمارے بارے میں کیا کہیں گے؟
یوں ہم اپنی منزل کے بجائے دوسروں کے راستے دیکھتے رہ جاتے ہیں۔حالانکہ کامیابی یہ نہیں کہ کتنے لوگ ہمیں جانتے ہیں؛ اصل کامیابی یہ ہے کہ ہماری وجہ سے کتنے لوگوں کی زندگی آسان ہوئی۔ کسی مایوس انسان کو امید دینا، کسی ضرورت مند کا سہارا بننا، والدین کی خدمت کرنا، رشتوں کی قدر کرنا، کسی بیٹی کا حوصلہ بڑھانا، علم بانٹنا اور معاشرے میں خیر پھیلانا بھی زندگی کے بڑے مقاصد ہیں۔ہمیں کبھی رک کر اپنے آپ سے پوچھنا چاہیے:
اگر آج زندگی کا سفر ختم ہو جائے تو ہمارے پیچھے کیا باقی رہ جائے گا؟ صرف نام، دولت اور شہرت؟ یا لوگوں کی دعائیں، اچھا کردار اور وہ نیکیاں جن کا فائدہ ہمارے بعد بھی جاری رہے؟ اگر ہم اپنے مقصد سے دور ہو چکے ہیں تو مایوس ہونے کی ضرورت نہیں۔ زندگی ابھی باقی ہے، سانسیں ابھی باقی ہیں اور خود کو بدلنے کا موقع بھی باقی ہے۔ اپنی ترجیحات درست کریں، اپنے وقت کی قدر کریں، اپنے رب سے تعلق مضبوط کریں، اپنے رشتوں کو وقت دیں اور جہاں تک ممکن ہو، کسی دوسرے انسان کے لیے آسانی کا سبب بنیں۔
یاد رکھیے!
زندگی کتنی لمبی ہے، یہ ہمارے اختیار میں نہیں؛ لیکن اسے کتنا بامقصد بنانا ہے، یہ ہمارے اختیار میں ضرور ہے۔ اس لیے آج خود سے ایک سوال کریں: ہم دنیا سے صرف یہ پوچھتے ہیں کہ ہمیں کیا ملا، یا کبھی یہ بھی سوچتے ہیں کہ ہم نے دنیا کو کیا دیا؟ شاید یہی ایک سوال ہمیں دوبارہ ہماری اصل منزل کی طرف لے جائے۔ کیونکہ مقصد کے ساتھ گزاری ہوئی زندگی ہی حقیقی اور بامعنی زندگی ہے۔
Our Life Our Purpose
