ضلع سکردو کے حلقہ نمبر 2 کے آخری اور اہم سیاحتی علاقے بشو کی دس ہزار سے زائد آبادی طویل عرصے سے بنیادی سہولیات سے محروم ہے ، معروف عالم دین شیخ عرفان حیدر بشوی
اسکردو معروف عالم دین شیخ عرفان حیدر بشوی نے کہا ہے کہ ضلع سکردو کے حلقہ نمبر 2 کے آخری اور اہم سیاحتی علاقے بشو کی دس ہزار سے زائد آبادی طویل عرصے سے بنیادی سہولیات سے محروم ہے۔ انہوں نے حکومت اور متعلقہ اداروں سے علاقے کے مسائل کا فوری نوٹس لینے اور عملی اقدامات کرنے کا مطالبہ کیا ہے۔ مرکزی جامع مسجد علی آباد بشو میں نماز جمعہ کے خطبے کے دوران شیخ عرفان حیدر بشوی نے علاقے کو درپیش مسائل اجاگر کرتے ہوئے کہا کہ بشو میں چار مقامات پر نماز جمعہ قائم ہے۔ قدرتی حسن، گھنے جنگلات اور دلکش پہاڑی مناظر کے باعث بشو سیاحوں کے لیے ایک اہم مرکز بن چکا ہے، تاہم مقامی آبادی کو تعلیم، صحت، مواصلات اور انفراسٹرکچر سمیت بنیادی سہولیات کی کمی کا سامنا ہے۔انہوں نے کہا کہ علاقے کے سرکاری اسکولوں میں فرنیچر، تعلیمی وسائل اور اساتذہ کی کمی کے باعث طلبہ کی تعلیم متاثر ہو رہی ہے۔ ان کا کہنا تھا کہ بعض LPC اسامیوں پر تعینات غیر مقامی اساتذہ کے طویل عرصے سے مبینہ طور پر غیر حاضر رہنے کی شکایات بھی سامنے آ رہی ہیں۔ انہوں نے متعلقہ حکام سے ان شکایات کی شفاف تحقیقات اور ذمہ دار افراد کے خلاف قانون کے مطابق کارروائی کا مطالبہ کیا۔ شیخ عرفان حیدر بشوی نے کہا کہ دس ہزار سے زائد آبادی والے علاقے بشو میں ایک بھی بنیادی طبی مرکز یا ڈسپنسری موجود نہیں، جس کے باعث مریضوں کو علاج کے لیے دور دراز علاقوں کا رخ کرنا پڑتا ہے۔ انہوں نے سلطان آباد، متیلو، بسینگو اور کرابہ تھنگ میں بنیادی طبی مراکز قائم کرنے اور خواتین کے لیے طبی عملہ تعینات کرنے کا مطالبہ کیا۔ انہوں نے کہا کہ سلطان آباد اور بسینگو کے جنگلات سمیت بشو کے متعدد سیاحتی مقامات پر موبائل نیٹ ورک اور انٹرنیٹ کی سہولت دستیاب نہیں، جس سے مقامی آبادی اور سیاحوں کو مشکلات کا سامنا ہے۔ ان کا کہنا تھا کہ سیاحتی علاقوں میں مواصلاتی سہولیات کی فراہمی سے نہ صرف سیاحوں کو سہولت ملے گی بلکہ مقامی معیشت کو بھی فروغ حاصل ہوگا۔ انہوں نے بشو کی سڑکوں اور پلوں کی خستہ حالی پر بھی تشویش کا اظہار کرتے ہوئے کہا کہ سیاحتی سیزن میں ٹریفک کے بڑھتے ہوئے دباؤ کے باعث بعض مقامات پر گاڑیوں کی آمدورفت گھنٹوں متاثر رہتی ہے۔ انہوں نے سڑکوں اور پلوں کی فوری مرمت، بحالی اور مستقل بنیادوں پر دیکھ بھال کا مطالبہ کیا۔ شیخ عرفان حیدر بشوی نے حکومت سے مطالبہ کیا کہ بشو کے تعلیمی، طبی، مواصلاتی اور انفراسٹرکچر کے مسائل کو ترجیحی بنیادوں پر حل کیا جائے۔ انہوں نے کہا کہ بشو کی ترقی سے نہ صرف مقامی آبادی کو بنیادی سہولیات میسر آئیں گی بلکہ علاقے کی سیاحتی استعداد سے بھرپور فائدہ اٹھا کر مقامی معیشت کو بھی مضبوط بنایا جا سکتا ہے۔
9 ربیع الاول عیدِ زہرا سلام اللہ علیہا اور آغازِ امامتِ امام زمانہؑ. شبیر حسین کمال
جمعۃ المبارک اور بارہ ربیع الاول — رحمتِ عالم ﷺ کی آمد کا پیغام. محمد عابد رشید
Bashu: Skardu’s Key Tourist Area
