محمد ﷺ 12 ربیع الاول، سرورِ انبیاء، تاجدارِ حرم.بتول فاطمہ
سرورِ انبیاء، تاجدارِ حرم، تجھ کو بھیجا گیا ہے کرم کے لیے
۱۲ ربیع الاول کا دن آتا ہے تو دل محبتِ رسول ﷺ سے روشن ہو جاتا ہے۔ یہ وہ مبارک نسبت ہے جو ہمیں اپنے محبوب نبی حضرت محمد مصطفیٰ ﷺ کی یاد دلاتی ہے۔ وہ ہستی جن کے ذریعے اللہ تعالیٰ نے ہمیں ایمان کی پہچان دی، قرآن کو سمجھنے کا راستہ دکھایا اور زندگی گزارنے کا وہ طریقہ سکھایا جس سے ایک مسلمان صرف مسلمان نہیں رہتا بلکہ مومن بننے کی کوشش کرتا ہے۔
اسلام اللہ تعالیٰ کا دین تھا، مگر ہم یہ کیسے جانتے کہ اسلام ہمیں صرف ماننا نہیں بلکہ جینا کیسے ہے؟ قرآن مجید اللہ تعالیٰ کا کلام ہے جو نبی پاک ﷺ پر نازل ہوا، مگر اس کی آیات کے معنی، احکام کی عملی صورت اور زندگی میں ان پر عمل کرنے کا طریقہ ہمیں رسول اللہ ﷺ نے سکھایا۔ آپ ﷺ نے قرآن کو صرف پڑھ کر نہیں سنایا بلکہ اپنی پوری زندگی سے قرآن کی تفسیر ہمارے سامنے پیش کر دی۔
اگر ہم حضور اکرم ﷺ کی سیرت کو دیکھیں تو ہمیں رحمت، شفقت، صبر، عاجزی، عدل، عفو و درگزر اور بہترین اخلاق کا ایسا نمونہ ملتا ہے جس کی کوئی مثال نہیں۔ آپ ﷺ نے دشمنوں کے لیے بھی رحمت کا رویہ اختیار کیا، کمزوروں کا سہارا بنے، یتیموں، مسکینوں اور محتاجوں کا خیال رکھا اور امت کو سکھایا کہ اصل بزرگی انسانوں کے ساتھ حسنِ اخلاق میں ہے۔
لیکن یہ دین ہمیں آسانی سے نہیں ملا۔ ہمارے نبی ﷺ نے اللہ کے دین کی خاطر بے شمار تکلیفیں برداشت کیں۔ طائف کی اذیت ہو، مکہ کے مظالم ہوں، شعبِ ابی طالب کی سختیاں ہوں یا ہجرت کا کٹھن سفر—آپ ﷺ ہر آزمائش میں ثابت قدم رہے۔ آپ ﷺ کے اہلِ بیت اور صحابۂ کرام رضوان اللہ علیہم اجمعین نے بھی دین کی خاطر بے مثال قربانیاں پیش کیں۔ ہم ان قربانیوں کو کبھی نہیں بھول سکتے۔
ہماری محبت صرف ایک دن کی محبت نہیں۔ رسول اللہ ﷺ سے محبت ہمارے ایمان کا حصہ ہے۔ اہلِ بیتِ اطہار سے ہماری محبت ہے، صحابۂ کرام رضوان اللہ علیہم اجمعین سے ہماری محبت ہے، تابعین سے ہماری محبت ہے، اور یہ محبت آج بھی ہمارے دلوں میں زندہ ہے اور ان شاء اللہ ہمیشہ زندہ رہے گی۔
درود و سلام سے جڑی میری بچپن کی ایک بہت پیاری یاد بھی ہے۔ جب میں بچپن میں سپارہ پڑھنے جایا کرتی تھی تو ہمارے قاری صاحب جمعہ کے دن ہمیں ایک کمرے میں بٹھاتے تھے۔ وہ کمرہ خوشبو سے مہک رہا ہوتا تھا۔ وہ ہمیں کچھ دیر کے لیے قرآنِ پاک پڑھانے کے بجائے کہتے کہ آج تم سب نے اونچی آواز میں درودِ پاک پڑھنا ہے۔ ہم بہت سے بچے ایک ساتھ بیٹھتے اور تقریباً بیس، پچیس منٹ یا آدھے گھنٹے تک محبت سے صَلَّى اللّٰهُ عَلَيْهِ وَآلِهِ وَسَلَّمَ پڑھتے رہتے۔
بچپن میں شاید ہمیں اس درود کی گہرائی اور اس کی برکت کا اتنا شعور نہیں تھا، مگر آج سوچتی ہوں تو وہ لمحے دل میں ایک عجیب سی روشنی بھر دیتے ہیں۔ کبھی کبھی درود پڑھتے پڑھتے مجھے نیند بھی آ جایا کرتی تھی، جیسے دل کو ایک ایسی نرمی اور سکون مل جاتا ہو جسے الفاظ میں بیان کرنا مشکل ہے۔
آج بھی یہ معمول میرے ساتھ ہے۔ جب جمعہ کے دن نماز پڑھنے کے بعد بیٹھتی ہوں تو کوشش کرتی ہوں کہ درودِ پاک کی تسبیح ضرور کروں۔ درود پڑھتے ہوئے دل کے اندر ایک عجیب سی ٹھنڈک اترتی ہے۔ یوں محسوس ہوتا ہے جیسے ہمارے اندر جو غم، بے چینی اور زندگی کی تھکن سے دل جل رہا ہوتا ہے، اس پر کسی نے محبت سے ٹھنڈا ہاتھ رکھ دیا ہو۔ دل کو قرار آنے لگتا ہے، سانسیں ہلکی محسوس ہوتی ہیں اور روح جیسے اپنے محبوب ﷺ کی نسبت میں سکون پانے لگتی ہے۔
میں جب یہ سوچتی ہوں کہ اللہ تعالیٰ نے مجھے محمد مصطفیٰ ﷺ کی امت میں پیدا فرمایا تو دل بے اختیار شکر سے بھر جاتا ہے۔ اس سے بڑھ کر میرے لیے اور کیا نعمت ہو سکتی ہے کہ میں اس نبی ﷺ کی امتی ہوں جنہوں نے ہمیں ہمارے رب سے جوڑنے کا راستہ دکھایا؟
آئیے اس ۱۲ ربیع الاول پر صرف چراغاں اور محفل تک اپنی محبت محدود نہ کریں، بلکہ اپنے محبوب نبی ﷺ کی سیرت کو اپنی زندگی کا حصہ بنائیں۔ آپ ﷺ کے اخلاق اپنائیں، آپ ﷺ کی سنت پر چلیں، آپ ﷺ کی تعلیمات پر عمل کریں اور کثرت سے درود و سلام پڑھیں۔
صَلَّى اللّٰهُ عَلَيْهِ وَآلِهِ وَسَلَّمَ ﷺ
اے اللہ! ہمیں ایمان کی زندگی عطا فرما، ایمان پر خاتمہ نصیب فرما، اپنے محبوب ﷺ کی سچی محبت عطا فرما، ان کی سنت پر چلنے کی توفیق دے اور قیامت کے دن ان کی شفاعت نصیب فرما۔
محمد ﷺ سے وفا کریں گے، ان کی سنت کو اپنائیں گے،
درود پڑھتے رہیں گے اور محبتِ رسول ﷺ کو اپنے دلوں میں زندہ رکھیں گے۔
۱۲ ربیع الاول مبارک سرورِ انبیاء، تاجدارِ حرم ﷺ کی امت ہونے پر لاکھوں شکر
Muhammad ﷺ: 12th Rabi’ al-Awwal, Leader of the Prophets