یونیورسٹی آف بلتستان، سکردو اور آسٹریا کی یونیورسٹیوں کے درمیان تعلیمی اور سیاحتی شعبوں میں باہمی تعاون کو فروغ دینے کے لیے اہم پیش رفت۔
رپورٹ، 5 سی این نیوز
ویانا، آسٹریا یونیورسٹی آف بلتستان کے ڈپٹی ڈائریکٹر تعلقات عامہ و بیرونی روابط، شمشاد حسین نے حال ہی میں ویانا میں پاکستان کے سفیر محمد کامران اختر ملک کے ساتھ ایک نتیجہ خیز ملاقات کی۔ پاکستانی سفارت خانے میں منعقدہ اس ملاقات میں ہیڈ آف چانسری جناب حسن عباس اور سیکنڈ سکریٹری مسٹر شاہ رخ خان بھی موجود تھے۔ اس موقع پر یونیورسٹی آف بلتستان (UOBS) اور آسٹریا کے تعلیمی و سیاحتی اداروں کے درمیان اسٹریٹجک شراکت داری قائم کرنے کی ضرورت پر زور دیا گیا۔ پاکستانی سفیر محمد کامران اختر ملک نے آسٹریا کے کوہ پیمائی کے ماہرین، انسٹرکٹرز، سیاحت کے پیشہ ور افراد اور تعلیمی اداروں کے ساتھ رابطوں کو آسان بنانے کے لیے پاکستانی سفارت خانے کے مکمل تعاون کا یقین دلایا۔ انہوں نے کہا کہ پاکستانی سفارت خانہ پاکستان اور آسٹریا کے اداروں کے درمیان روابط کو فروغ دینے کے لیے تمام وسائل بروئے کار لائے گا اور زیادہ سے زیادہ یورپی سیاحوں کو پاکستان کی طرف راغب کرے گا۔ سفیر کامران ملک نے پاکستان اور آسٹریا کے مابین مضبوط صنعتی اور عوامی روابط کو فروغ دینے کی اہمیت کو اجاگر کرتے ہوئے کہا کہ اس طرح کے تعاون سے دونوں ممالک کی اقتصادی ترقی میں نمایاں مدد ملے گی۔ شمشاد حسین نے کہا کہ یونیورسٹی آف بلتستان اور آسٹریا کی یونیورسٹیوں کے درمیان تعلیمی شعبوں میں تعاون کے وسیع امکانات موجود ہیں۔ انہوں نے بتایا کہ دونوں ممالک کی یونیورسٹیاں طلبہ کے تبادلے کے پروگرامز (اسٹوڈنٹ ایکسچینج پروگرامز) کے علاوہ سیاحت کے شعبے سے وابستہ افراد اور طلبہ کے لیے شارٹ کورسز کا اجراء بھی کر سکتی ہیں۔ ملاقات کے اختتام پر شمشاد حسین نے یونیورسٹی آف بلتستان کی جانب سے سفیر کامران ملک اور ان کی ٹیم کو تعریفی ٹوکنز پیش کیے۔
urdu news, University of Baltistan, Skardu
0
