5 اگست 2019 کشمیری عوام کی تاریخ کا ایک اہم اور المناک دن ہے. شگر ہدیتہ الہادی گلگت بلتستان
رپورٹ. 5 سی این نیوز
شگر ہدیتہ الہادی گلگت بلتستان کے ڈپٹی جنرل سیکرٹری اور ضلع شگر کی امن کمیٹی کے رکن رضوان اللہ شگری نے کہا ہے کہ 5 اگست 2019 کشمیری عوام کی تاریخ کا ایک اہم اور المناک دن ہے، جب مقبوضہ جموں و کشمیر کی خصوصی آئینی حیثیت کو یکطرفہ طور پر ختم کر دیا گیا، جس کے بعد خطے میں بے چینی اور غیر یقینی صورتحال میں اضافہ ہوا۔ یومِ استحصالِ کشمیر کے موقع پر اپنے پیغام میں انہوں نے کہا کہ یہ دن اس حقیقت کی یاد دلاتا ہے کہ کشمیری عوام آج بھی امن، انصاف اور اپنے بنیادی حقوق کے حصول کے لیے جدوجہد کر رہے ہیں۔ انہوں نے کہا کہ کشمیری عوام کی ثابت قدمی اور قربانیاں اس بات کا ثبوت ہیں کہ حق اور انصاف کی آواز کو دبایا نہیں جا سکتا۔رضوان اللہ شگری نے عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی صورتحال پر مؤثر توجہ دے اور کشمیری عوام کے جائز حقوق کے تحفظ، انصاف کے قیام اور دیرپا امن کے لیے اپنا فعال کردار ادا کرے۔انہوں نے کہا کہ یومِ استحصالِ کشمیر کے موقع پر کشمیری عوام کے ساتھ اظہارِ یکجہتی کرنا ہم سب کی ذمہ داری ہے۔ انہوں نے دعا کی کہ اللہ تعالیٰ کشمیری عوام کو امن، عزت، انصاف اور اپنے جائز حقوق کے حصول کی توفیق عطا فرمائے۔