شگر کے ٹو کے دامن میں امام سجاد میڈیکل سنٹر کا قیام، غوینگو بیانگسہ کے عوام کو بنیادی صحت کی سہولت میسر آگئی
رپورٹ، 5 سی این نیوز
شگر کے ٹو کے دامن میں امام سجاد میڈیکل سنٹر کا قیام، غوینگو بیانگسہ کے عوام کو بنیادی صحت کی سہولت میسر آگئی
شگر کے ٹو کے دامن میں امام سجاد میڈیکل سنٹر کا قیام، غوینگو بیانگسہ کے عوام کو بنیادی صحت کی سہولت میسر آگئی، دنیا کی دوسری بلند ترین چوٹی کے ٹو کے دامن میں واقع ضلع شگر کے دور افتادہ گاؤں غوینگو بیانگسہ میں مقامی کمیونٹی نے اپنی مدد آپ کے تحت صحت کے شعبے میں اہم اقدام کرتے ہوئے امام سجاد میڈیکل سنٹر قائم کردیا، جس کی افتتاحی تقریب میں مقامی عمائدین، سرکردگان اور نوجوانوں کی بڑی تعداد نے شرکت کی۔ میڈیکل سنٹر کا باقاعدہ افتتاح ڈسٹرکٹ ہیلتھ آفیسر (DHO) شگر نے کیا۔ تقریب میں ڈی ایچ او شگر، سرپرستِ اعلیٰ بیانگسہ شیخ عباس، ماسٹر شبیر احمد سمیت علاقے کے عمائدین اور مختلف شعبہ ہائے زندگی سے تعلق رکھنے والے افراد شریک ہوئے۔ تقریب سے خطاب کرتے ہوئے سرپرستِ اعلیٰ بیانگسہ شیخ عباس نے کہا کہ دور افتادہ اور دشوار گزار علاقوں میں صحت کی بنیادی سہولیات کی فراہمی وقت کی اہم ضرورت ہے۔ مقامی کمیونٹی کی جانب سے اپنی مدد آپ کے تحت میڈیکل سنٹر کا قیام ایک قابلِ تحسین اقدام ہے، جس سے علاقے کے عوام کو علاج معالجے کی بنیادی سہولیات کے لیے دور دراز علاقوں کا سفر کرنے کی مشکلات میں کمی آئے گی۔انہوں نے کہا کہ امام سجاد میڈیکل سنٹر صرف غوینگو بیانگسہ تک محدود نہیں رہے گا بلکہ اس سے پورے برالدو اور ملحقہ علاقوں کے عوام بھی مستفید ہوں گے۔ اس فلاحی مشن کو مستقبل میں مزید وسعت دینے کے لیے بھرپور کوششیں جاری رکھی جائیں گی۔ اس موقع پر ڈی ایچ او شگر نے مقامی کمیونٹی کی کاوش کو سراہتے ہوئے کہا کہ علاقے کے عوام کی فلاح و بہبود کے لیے اس نوعیت کے اقدامات قابلِ قدر ہیں۔ محکمہ صحت کی جانب سے میڈیکل سنٹر اور مقامی کمیونٹی کو ہر ممکن تعاون فراہم کیا جائے گا۔ انہوں نے کہا کہ عوام کی خدمت کے لیے محکمہ صحت ہر ممکن تعاون کے لیے تیار ہے اور مقامی کمیونٹی کے ساتھ رابطہ اور تعاون آئندہ بھی جاری رکھا جائے گا تاکہ دور افتادہ علاقوں میں صحت کی سہولیات کو مزید بہتر بنایا جاسکے۔ مقامی عمائدین اور شہریوں نے امام سجاد میڈیکل سنٹر کے قیام کو علاقے میں بنیادی صحت کی سہولیات کی فراہمی کی جانب ایک اہم پیش رفت قرار دیتے ہوئے کہا کہ اس مرکز کے فعال ہونے سے غوینگو بیانگسہ اور گردونواح کے لوگوں کو علاج معالجے کی بنیادی سہولیات اپنی دہلیز پر دستیاب ہوں گی۔ علاقہ مکینوں نے میڈیکل سنٹر کے قیام میں کردار ادا کرنے والی مقامی کمیونٹی اور تمام معاونین کا شکریہ ادا کرتے ہوئے امید ظاہر کی کہ مرکز مستقبل میں مزید سہولیات سے آراستہ ہوگا اور برالدو کے دور افتادہ علاقوں میں صحت کے شعبے میں ایک مؤثر فلاحی مرکز کے طور پر خدمات انجام دے گا۔
Imam Sajjad Medical Center Established
