گلگت بلتستان میں سردی کی قبل از وقت آمد, اشرف حسین شگری (جیولوجسٹ
گلگت بلتستان سمیت پورے پاکستان میں اس سال سردی معمول سے پہلے آنے کے امکانات بڑھ گئے ہیں۔ ماہرین کا کہنا ہے کہ عالمی موسمیاتی تبدیلیاں اور مقامی موسمی اثرات نے سردیوں کے روایتی شیڈول کو غیر یقینی بنا دیا ہے۔ اس کے نتیجے میں وادیوں میں ٹھنڈی ہوائیں اور برفباری وقت سے پہلے شروع ہو سکتی ہے۔
خنجراب پاس، بابوسر اور دیوسائی جیسے بلند مقامات پر برفباری پہلے ہی شروع ہو چکی ہے۔ پہاڑوں نے سفید چادر اوڑھ لی ہے، اور بلتستان ڈویژن کے کئی علاقوں میں درجہ حرارت نقطہ انجماد سے نیچے جا چکا ہے۔ یوں لگتا ہے کہ اس سال سردیوں کا موسم لمبا اور سخت ہو سکتا ہے، خاص طور پر اگر مغربی ہوائیں (Western Disturbances) سلسل فعال رہیں۔
محکمہ موسمیات کے مطابق شمالی پاکستان میں اس سال اوسط درجہ حرارت پچھلے برسوں کے مقابلے میں 4 سے 5 ڈگری زیادہ رہنے کا امکان ہے۔ لیکن اس کا مطلب یہ نہیں کہ سردی کم محسوس ہوگی۔ دن کے وقت درجہ حرارت معمولی بڑھ سکتا ہے، مگر رات کے وقت اور پہاڑی علاقوں میں سردی کی شدت برقرار رہے گی۔
گلیشیئرز کے پگھلنے اور موسموں کے نظام میں بگاڑ کے باعث خطرہ ہے کہ گلیشیئر جھیلوں کے پھٹنے (GLOF) اور سیلابی ریلوں کے واقعات بڑھ جائیں۔ گرم ہوا کے اوپر اٹھنے سے کبھی کبھار اچانک مگر شدید بارشیں بھی ہو سکتی ہیں، جو لینڈ سلائیڈنگ کے خدشات کو بڑھاتی ہیں۔
پاکستان کے دیگر علاقوں میں سردیوں کا آغاز شاید معمول کے مطابق ہو، مگر گلگت بلتستان میں سردی کی پیش قدمی سب سے نمایاں محسوس کی جا رہی ہے۔ یہاں کے گلیشیئرز، اونچے پہاڑ اور شمالی ہوائیں اس خطے کو باقی ملک سے زیادہ حساس بنا دیتی ہیں۔
عالمی موسمیاتی تنظیم کے مطابق اس سال La Niña کے اثرات پاکستان پر نمایاں رہ سکتے ہیں۔ بحرالکاہل کے درجہ حرارت میں کمی سے عام طور پر ہمارے خطے میں خشک موسم آتا ہے، مگر شمالی پاکستان میں سردی کی شدت اور قبل از وقت برفباری کے امکانات بڑھ جاتے ہیں۔
گلگت بلتستان میں سردیوں کا قبل از وقت آغاز دراصل عالمی موسمیاتی تبدیلیوں کی ایک نشانی ہے۔ درجہ حرارت میں غیر معمولی اتار چڑھاؤ اور موسم کے شیڈول میں تبدیلی نے خطے کے نازک ماحولیاتی توازن کو متاثر کیا ہے۔ یہی وجہ ہے کہ یہاں کے لوگ ہر سال سردیوں کی تیاری پہلے سے بہتر طریقے سے کرنے کی ضرورت محسوس کر رہے ہیں، کیونکہ ان بلند وادیوں میں موسم کی سختی کسی کے انتظار میں نہیں رہتی۔