مقابلہ مضمون ، نئے سال نئی ثمرات ، آمینہ یونس
سال کا بدلنا صرف ہندسوں کا بدلنا نہیں ہے بلکہ اس میں انسان کی عمر بدلتی ہے، خیالات بدلتے ہیں اور ترجیحات بدلتی ہیں۔ جو کچھ پہلے سے ہو رہا ہوتا ہے یا انسان جو کام کر رہا ہوتا ہے، نئے سال میں لوگ اسے ایک نیا زاویہ دینے کا سوچتے ہیں۔ جو کام چل نہیں رہا ہوتا اسے چھوڑ کر کہیں نیا آغاز کرتے ہیں یا نئی جگہ ہجرت کر جاتے ہیں۔ کئی سال سے اگر گھر بنانے کا سوچ رہے ہوں تو نئے سال میں اسے عملی جامہ پہناتے ہیں۔ کبھی انسان کسی کام پر کئی سال سے محنت کر رہا ہوتا ہے اور مایوس ہو چکا ہوتا ہے، مگر نئے سال میں اچانک اس محنت کا پھل مل جاتا ہے تو آنکھوں میں خوشی اور شکر کے ملے جلے آنسو رقص کرنے لگتے ہیں۔ اس کے علاوہ نئے سال میں نئی منصوبہ بندی انسان کے لیے کئی نئی راہیں کھول دیتی ہے اور پہلے سے سوچا ہوا منصوبہ پایہ تکمیل تک پہنچتا ہے۔ سال کا بدلنا صرف ہندسوں کا بدلنا نہیں بلکہ اس میں انسان کی بہت سی خواہشات کی تکمیل ہوتی ہے، رکے ہوئے کام حل ہوتے ہیں اور کبھی اچانک کوئی خوشی کی خبر بھی مل جاتی ہے۔ جیسے یہ سال میرے لیے تو ثمرات ہی لے کر آیا ہے، دس روزہ بین الصوبائی اقامتی منصوبے میں شمولیت، پھر اس کے لب و لباب سے فیض یاب ہونا، نامور شعرا اور ادبا کی گفتگو سننا، ان سے ملاقات کرنا اور انہیں سامنے سے دیکھنا۔ یعنی ہم یہ نہیں کہہ سکتے کہ یہ صرف ہندسوں کا بدلنا ہے بلکہ سال تاریخوں کے ساتھ قوموں کی تقدیریں بھی بدلتے ہیں اگر وہ چاہیں، کوشش کریں اور ترقی کی دوڑ میں مسلسل جدو جہد جاری رکھیں۔ یقین اور مستقل مزاجی کے ساتھ چلتے رہیں تو نیا سال بہت سے ثمرات کے ساتھ استقبال کرتا ہے، اپنے دامن میں پھول لیے راستوں میں روشنی بنتا ہے اور ہاتھ تھام کر منزل تک پہنچا دیتا ہے۔ اس کے لیے محنت ضروری ہے، نامساعد حالات میں خود کو مضبوط رکھنا پڑتا ہے کیونکہ محنت کبھی ضائع نہیں ہوتی اور اس کے ثمرات دیرپا ہوتے ہیں۔ نیا عزم حوصلے کو جواں بناتا ہے اور جب حوصلہ جواں ہو تو انسان مشکلات میں بھی کامیابی کا راستہ ڈھونڈ کر خود کو منوا لیتا ہے۔
column in urdu Essay Competition New Year, New Rewards
