ضلع شگر میں رہبرِ معظم انقلاب اسلامی آیت اللہ سید علی خامنہ ای کی امریکہ اور اسرائیل کے ہاتھوں شہادت کے خلاف پانچویں روز بھی احتجاج کا سلسلہ جاری رہا
رپورٹ ۔ 5 سی این نیوز
ضلع شگر میں رہبرِ معظم انقلاب اسلامی آیت اللہ سید علی خامنہ ای کی امریکہ اور اسرائیل کے ہاتھوں شہادت کے خلاف پانچویں روز بھی احتجاج کا سلسلہ جاری رہا۔ بعد از نمازِ ظہرین خانقاہِ معلیٰ شگر سے ایک بڑی احتجاجی ریلی نکالی گئی جس میں ہزاروں افراد نے شرکت کی۔ ریلی کی قیادت امام جمعہ جامع مسجد امامیہ شگر سید طہ الموسوی کر رہے تھے۔ ریلی خانقاہِ معلیٰ سے شروع ہو کر مختلف شاہراہوں سے ہوتی ہوئی حسینی چوک شگر پہنچی جہاں احتجاجی اجتماع منعقد ہوا۔ اجتماع سے سید طہ الموسوی، شیخ نثار مہدی حیدری، شیخ اشرف حسین شگری، محمد ظہیر عباس، شیخ اسماعیل اور دیگر مقررین نے خطاب کیا۔ مقررین نے اپنے خطاب میں کہا کہ رہبرِ معظم کی شہادت اس صدی کا ایک عظیم سانحہ ہے اور رہبر جیسی عظیم شخصیات صدیوں بعد پیدا ہوتی ہیں۔ انہوں نے کہا کہ آیت اللہ سید علی خامنہ ای نہ صرف اپنے مقلدین کے رہنما تھے بلکہ مختلف مسالک اور مذاب کے افراد بھی انہیں اپنا رہنما سمجھتے تھے۔ مقررین کا کہنا تھا کہ رہبرِ معظم کی شہادت پر عوام کا غم و غصہ فطری اور جائز ہے، تاہم عوام جلاؤ گھیراؤ جیسے واقعات میں ملوث نہیں ہیں۔ انہوں نے انتظامیہ سے مطالبہ کیا کہ بے گناہ نوجوانوں کو ان واقعات میں ملوث قرار دے کر بلاجواز پکڑ دھکڑ نہ کی جائے اور نوجوانوں کو ہراساں کرنے کا سلسلہ بند کیا جائے۔ اس موقع پر شیخ اشرف حسین شگری نے گزشتہ دنوں پاک فوج کے ایک اعلیٰ افسر کی جانب سے علماء کے ساتھ ہونے والی ملاقات کی تفصیلات سے بھی شرکاء کو آگاہ کیا۔ انہوں نے بتایا کہ آرمی افسر نے علماء سے رہبرِ معظم کی شہادت پر تعزیت کا اظہار کیا تھا۔ اس موقع پر علماء نے اپنا موقف پیش کرتے ہوئے کہا کہ پاک فوج ہمارے ماتھے کا جھومر ہے اور گلگت بلتستان کا بچہ بچہ پاک فوج کے شانہ بشانہ کھڑا ہے۔ یہاں کے عوام ریاست کے سب سے زیادہ محب وطن شہری ہیں اور ریاست کو عوام کے لیے ماں کی حیثیت حاصل ہے۔ مقررین نے کہا کہ تاہم ریاست گلگت بلتستان کے عوام کے ساتھ سوتیلی ماں جیسا سلوک نہ کرے۔ ہم سب اس وقت غم کی کیفیت میں تھے اور اگر غم کے عالم میں کہیں کوئی غلطی ہو گئی ہو تو ریاست کو عفو و درگزر سے کام لینا چاہیے۔ انہوں نے خبردار کیا کہ اگر نوجوانوں کو تنگ کرنے کا سلسلہ جاری رکھا گیا تو عوام خاموش نہیں رہیں گے اور میدان میں نکلنے پر مجبور ہوں گے۔
Urdu news update Gilgit Baltistan news