گلگت بلتستان میں بھکاری مافیا اور علاقائی سالمیت کو لاحق خطرات عوامی آگاہی کے لیے ایک ضروری پیغام، ایڈوکیٹ کلثوم علیاء شگری
رپورٹ، 5 سی این نیوز
گلگت بلتستان میں بھکاری مافیا اور علاقائی سالمیت کو لاحق خطرات عوامی آگاہی کے لیے ایک ضروری پیغام، ایڈوکیٹ کلثوم علیاء شگری
ہمارے معاشرے میں بڑھتی ہوئی غربت اور بےروزگاری نے جہاں کئی مسائل کو جنم دیا ہے، وہیں ایک نیا خطرہ خاموشی سے جڑیں پکڑ رہا ہے ۔۔ وہ ہے بھکاری مافیا۔ یہ صرف خیرات مانگنے تک محدود نہیں رہے بلکہ اب یہ ایک منظم نیٹ ورک کی شکل اختیار کر چکے ہیں، جو علاقائی سالمیت، سماجی اقدار، اور قومی سلامتی کے لیے ایک بڑا خطرہ بن چکے ہیں۔
چند پیسوں کی خاطر عزت کا سودا۔
جب انسان خودداری چھوڑ کر صرف چند روپوں کے لیے اپنی عزتِ نفس کو بیچنے لگے، تو وہ آہستہ آہستہ ایسے راستے اختیار کر لیتا ہے جو صرف ذلت، جرم اور تباہی کی طرف لے جاتے ہیں۔ اگر معمولی خیرات کے لیے عزت کی پرواہ نہ کی جائے، تو زیادہ پیسوں کی لالچ میں انسان کیا کچھ کر سکتا ہے، اس کا اندازہ درج ذیل باتوں سے لگایا جا سکتا ہے:

1۔ مجرمانہ سرگرمیوں میں ملوث ہونے کے امکانات

جاسوسی اور مخبری:
بہت سے نام نہاد بھکاری درحقیقت خفیہ طور پر حساس مقامات، فوجی تنصیبات، یا شخصیات پر نظر رکھتے ہیں اور دشمن عناصر کو اطلاعات فراہم کرتے ہیں۔

جسم فروشی اور انسانی اسمگلنگ
خواتین اور بچے جو اس مافیا کا حصہ بن جاتے ہیں، ان میں سے کئی کو جسم فروشی یا انسانی اسمگلنگ جیسے گھناؤنے دھندوں میں دھکیلا جاتا ہے۔

منشیات کی اسمگلنگ
بچوں اور عورتوں کو بطور کور استعمال کر کے منشیات کی ترسیل کروائی جاتی ہے، کیونکہ ان پر شک کم ہوتا ہے۔

دہشت گردوں کے لیے سہولت کاری
کئی بار یہ بھکاری گروہ دہشت گرد عناصر کی مدد کے لیے ان کو محفوظ پناہ گاہیں، اطلاعات، یا رسد فراہم کرتے ہیں، جس سے علاقائی سالمیت کو شدید خطرہ لاحق ہوتا ہے۔

2۔۔ جی بی عوام کی ذمہ داری

– بھکاری کو پیسے دینے سے پہلے سوچیں کہ آپ اس پیسے سے کسی جرم کو تقویت تو نہیں دے رہے؟
– اصل مستحق کو تلاش کریں، کسی فلاحی ادارے یا قابل اعتماد ذریعے سے مدد کریں۔
– اگر کسی بھکاری کی حرکات مشکوک ہوں، تو متعلقہ حکام کو اطلاع دیں۔
– اپنے بچوں اور اہلِ خانہ کو اس بارے میں شعور دیں تاکہ وہ ان سے محفوظ رہ سکیں۔

3۔۔ حکومتی و ادارہ جاتی اقدامات کی ضرورت۔

– ریاستی سطح پر مافیا کے خلاف سخت ایکشن لیا جائے۔
– فلاحی ادارے متحرک ہوں اور اصل مستحقین تک پہنچیں۔
– بھیک مانگنے کو کم کرنے کے لیے روزگار کے مواقع بڑھائے جائیں۔
– عوامی آگاہی مہمات چلائی جائیں تاکہ لوگ جذبات کے بجائے شعور سے فیصلہ کریں۔

بھکاری مافیا صرف معاشرتی نہیں بلکہ قومی سلامتی کا مسئلہ بنتا جا رہا ہے۔ ہمیں بحیثیت ذمہ دار شہری اس معاملے کو سنجیدگی سے لینا ہوگا۔ اگر ہم نے آج آنکھیں بند رکھیں، تو کل یہ خطرہ ہماری نسلوں کے مستقبل کو نگل جائے گا.

Urdu news, integrity are an essential message for public awareness