اسلام آباد: پاک امریکا تعلقات میں بہتری اور ایف آئی اے کی تنظیم نو پر اتفاق
اسلام آباد: پاک امریکا تعلقات میں بہتری اور ایف آئی اے کی تنظیم نو پر اتفاق
رپورٹ، 5 سی این نیوز
وفاقی وزیر داخلہ محسن نقوی اور امریکا کی قائمقام سفیر نیٹلی بیکر کے درمیان ملاقات میں پاک امریکا تعلقات کو مزید مضبوط بنانے اور ایف آئی اے کو جدید خطوط پر استوار کرنے کے لیے تعاون پر اتفاق کیا گیا۔
ملاقات کی تفصیلات
قائمقام امریکی سفیر نے اسلام آباد میں پولیس اور رینجرز اہلکاروں کی شہادت پر اظہار تعزیت کیا۔ کنٹری ڈائریکٹر آئی این ایل لائن نیلسن بھی اس ملاقات میں شریک تھے۔
دونوں رہنماؤں نے پاکستان میں آئی سی سی چیمپئنز ٹرافی کے کامیاب انعقاد کے حوالے سے نیک خواہشات کا اظہار کیا اور دوطرفہ تعاون کے دیگر پہلوؤں پر بھی گفتگو کی۔
ایف آئی اے کو ایف بی آئی طرز پر بنانے کا منصوبہ
وفاقی وزیر داخلہ محسن نقوی نے کہا کہ پاکستان ایف آئی اے کو ایف بی آئی کی طرز پر جدید اور فعال ادارہ بنانا چاہتا ہے۔
– امریکا نے اس منصوبے میں معاونت فراہم کرنے کی یقین دہانی کرائی۔
– امریکا نیشنل فرانزک ایجنسی کو جدید تقاضوں کے مطابق فعال کرنے میں بھی مدد کرے گا۔
– سول آرمڈ فورسز کو جدید آلات اور سازوسامان کی فراہمی وقت کی اہم ضرورت قرار دی گئی۔
غیر قانونی مقیم غیر ملکیوں کے خلاف اقدامات
محسن نقوی نے واضح کیا کہ غیر قانونی طور پر مقیم افراد کو اسلام آباد میں رہنے کی اجازت نہیں دی جائے گی، جبکہ قانونی دستاویزات رکھنے والے غیر ملکیوں کو نکالا نہیں جائے گا۔
امریکی سفیر کا بیان
قائمقام سفیر نیٹلی بیکر نے پاکستان میں قانون نافذ کرنے والے اداروں میں خواتین کی نمائندگی بڑھانے پر زور دیا اور اس سلسلے میں پاکستانی حکام کے ساتھ مل کر کام کرنے کا عزم ظاہر کیا۔
انہوں نے پولیس افسران کی پاسنگ آؤٹ پریڈ کے انعقاد پر محسن نقوی کو مبارکباد بھی دی۔
اعلیٰ حکام کی شرکت
ملاقات میں وفاقی سیکرٹری داخلہ خرم علی آغا اور ایڈیشنل سیکرٹری داخلہ رفعت مختار راجہ بھی موجود تھے، جہاں دوطرفہ تعاون کے مزید پہلوؤں پر بات چیت ہوئی۔
URDU NEWSشگر ، ایجوکیشن فیلو پروگرام کا خاتمہ پسماندہ علاقوں کے سکولوں کے ساتھ ظلم ہے۔ فیصلہ واپس لیا جائے۔عمائدین برالدو شگر
