سخت پہاڑ اور نرم دل لوگ
تحریر:احمد روح اللہ شگری
گلگت بلتستان ایک دلکش خطہ ہے جہاں دنیا کے تین بڑے پہاڑی سلسلے ملتے ہیں: قراقرم، ہمالیہ اور ہندوکش۔ یہی علم و جغرافیہ اس علاقے کو ایک انوکھا اور حیرت انگیز مقام بناتے ہیں۔ عظیم پہاڑوں کے دامن میں واقع کے ٹو دنیا کی دوسری بلند ترین چوٹی ہے جو پاکستان کی شان کہلاتی ہے۔ اسی طرح نانگا پربت اور دیگر بلند چوٹیاں بھی پاکستان کی قدرتی خوبصورتی میں بے مثال اضافہ کرتی ہیں۔
ان پہاڑوں میں قیمتی معدنیات کے ذخائر موجود ہیں۔ ہنزہ، شگر اور سکردو کے علاوہ دیگر علاقوں میں اعلیٰ معیار کے روبی، ایکوامرین، ٹورملین، گارنیٹ اور دیگر قیمتی پتھروں کی کانیں موجود ہیں، جب کہ کئی مقامات پر سفائر بھی ملتا ہے۔ سیاحت کے بے شمار مواقع یہاں دستیاب ہیں اور موسم زیادہ تر خوشگوار رہتا ہے، خاص طور پر گرمیوں میں۔ اگر کوئی پہاڑوں کی سیر، ندیوں میں مہم جوئی یا مقامی لوگوں کی ثقافتی تقریبات میں حصہ لے تو اسے ایک یادگار تجربہ حاصل ہوتا ہے۔
پہاڑوں کی موجودگی یہاں کی ثقافت اور روایت پر بھی گہرا اثر ڈالتی ہے۔ گلگت بلتستان کے لوگ پہاڑوں کے درمیان بظاہر پرسکون مگر حقیقت میں چیلنجز سے بھرپور زندگی گزارتے ہیں۔ سردیوں میں درجہ حرارت منفی میں چلا جاتا ہے، راستے بند ہو جاتے ہیں اور برف باری معمول بن جاتی ہے۔ سخت موسم اور دشوار گزار راستوں نے یہاں کے لوگوں کو صبر اور حوصلہ سکھا دیا ہے۔
اس علاقے کی سب سے بڑی خوبصورتی لوگوں کا باہمی تعاون ہے۔ ایک محلے سے دوسرے محلے تک لوگ ایک دوسرے کے دکھ سکھ میں شریک رہتے ہیں۔ چاہے راستے سے برف صاف کرنا ہو یا کسی کے گھر کوئی مسئلہ، سب ایک ہو کر ساتھ دیتے ہیں۔ یہاں آنے والے مہمانوں کو عزت اور احترام کا مقام دیا جاتا ہے۔ مقامی لوگ اپنے گھروں کے دروازے ہمیشہ مسافروں کے لیے کھلے رکھتے ہیں۔ اگر کوئی مسافر ان کے گاؤں میں داخل ہو جائے تو اسے دلی اور خلوص سے خوش آمدید کہا جاتا ہے۔
یہاں کے لوگ سادہ زندگی گزارتے ہیں لیکن دلوں کے لحاظ سے نہایت امیر ہوتے ہیں۔ ان کی مہمان نوازی کا یہ عالم ہے کہ پہاڑوں کے سخت موسم اور مشکلات میں بھی کسی کو اکیلا نہیں چھوڑتے۔ دنیا بھر سے آنے والے سیاح اس بات کا اعتراف کرتے ہیں کہ گلگت بلتستان نہ صرف قدرتی حسن سے بھرپور ہے بلکہ یہاں کے لوگ بھی بے حد مخلص اور وفادار ہیں۔ اگر کوئی راستہ بھٹک جائے، گاڑی خراب ہو جائے یا کسی چیز کی ضرورت پڑ جائے تو مقامی لوگ بلا جھجھک مدد کے لیے تیار ہو جاتے ہیں۔ یہی وجہ ہے کہ جو بھی ایک بار یہاں آئے، دوبارہ آنے کی خواہش لے کر جاتا ہے۔