شگر میں شاہراہ کے ٹو کی بندش، ڈپٹی کمشنر کا دورہ، فوری بحالی کی ہدایات, ڈپٹی کمشنر شگر عارف حسین نے ضلعی اداروں کے سربراہان کے ہمراہ شاہراہ کے ٹو کے سیلاب سے متاثرہ مقامات کا دورہ
رپورٹ، 5 سی این نیوز
شگر میں شاہراہ کے ٹو کی بندش، ڈپٹی کمشنر کا دورہ، فوری بحالی کی ہدایات, ڈپٹی کمشنر شگر عارف حسین نے ضلعی اداروں کے سربراہان کے ہمراہ شاہراہ کے ٹو کے سیلاب سے متاثرہ مقامات کا دورہ کیا اور ایمرجنسی نافذ کرکے فوری طور پر سڑک کھلوانے کی ہدایات جاری کیں۔گزشتہ ماہ آنے والے شدید سیلاب کے باعث دفاعی اور سیاحتی اعتبار سے نہایت اہم شاہراہ کے ٹو کئی مقامات پر بلاک ہوگئی تھی جس کے نتیجے میں بالائی برالدو کا زمینی رابطہ ملک کے دیگر حصوں سے منقطع ہے۔ اس صورتحال نے مقامی آبادی کو شدید مشکلات سے دوچار کر رکھا ہے۔ڈپٹی کمشنر کے ہمراہ اسسٹنٹ کمشنر فیصل حیات گوندل، ایکسین سی اینڈ ڈبلیو زکاوت علی، محکمہ برقیات، واٹر مینجمنٹ اور ریونیو عملہ بھی موجود تھا۔ وفد نے کئی گھنٹے پیدل سفر کرکے متاثرہ مقامات کا جائزہ لیا۔اس موقع پر ڈپٹی کمشنر نے محکمہ تعمیرات کو ہدایت دی کہ ایمرجنسی بنیادوں پر سڑک کی بحالی کے لیے فوری اقدامات کیے جائیں، جبکہ خراب ایکسکیوٹر کی مرمت کرکے ہیوی مشینری کے ذریعے متاثرہ حصوں پر کام شروع کرنے کی بھی ہدایت کی گئی۔مزید برآں ریونیو عملے اور دیگر اداروں کے ذمہ داران کو برالدو کے عوامی مسائل اور شکایات کا قریب سے جائزہ لینے اور فوری رپورٹ پیش کرنے کی ہدایت جاری کی گئی تاکہ متاثرین کو بروقت ریلیف فراہم کیا جا سکے۔
urdu news, weather in gilgit Baltistan